收股息之日，壯士斷臂時

恆指穿15,000點，股市一片哀嚎，遇上今年最後一隻股票派息，根據過往遇上股災嘅習慣，收息日就係我執倉之日，咁樣感覺無輸咁多，內心好過少少！

MGM，早年9蚊揸起，跌1蚊一注，經過co-19洗禮，始終喺3.1頂唔順，清倉走人。輸得慘過金沙，又一堂血淚教訓。

清倉MGM，一殼眼淚！Y_Y

呢個月3隻股票派糖，亦喺今年最後派彩，所謂價投被動收入。
" 883、173、857 "

好彩呢3隻嘢嘅股息，夠頂隻垃圾mgm條爛數，唯有攞返D傷心錢，以支日後東山再起。

持倉賬面仍然輸緊18%，今年股息收入繼續破記錄勁過上年，完全多得石油股，扣返股息收入，個pool暫時都要輸11%左右。

股災印記

今日大成交，加上跌-1,030點。你話唔係股災就假喇哈，身邊D少聯絡開嘅股友今日都有2句，唯肯買貨嘅少。

以年計，恆指已經跌咗11,000點(26235-15099)左右，就呢個月已經跌咗3,000點(18164-15099)，呢個星期第一日就1,000，環環相扣。

記憶中一個月跌成3,000點嘅，有2013年，2016年同2018，而2020同今年2022年頭3月嘅呢2次，跌5,000點左右。呢個月仲有4日，加油啊!!記錄係用黎破嘅~

曾經有blogger總結過，今日攞返出黎鞭下自己先：

1. “大跌市撈底好股,長線而言是有利可圖。所以真正的價值投資者, 不應怕股災, 只應怕股災發生時, 沒有足夠資金去撈底, 所以資金管理是很重要的。”

2. “撈底要有策略, 宜分段進行, 不然在不理性拋售後, 出現更不理性拋售時,你已經無能為力, 只能做旁觀者。”

呢次絕對係機會，就好似世界杯同奧運咁，你唔識玩或者無興趣都要同身邊嘅人J下。唔好怕輸，當買六合彩，反正六合彩唔中都Total Loss.股票有渣比返你嘅！