回顧2017，展望2018

由2016年建blog開始已經一年有多，當年2016總結咗一點心得，係今年都一直嘗試改進同堅持。經歷2015年大傷元氣之後，按入賬計，用2年時間總算填返個氹，雖然還差一D，但亦心滿意足，期望下年能夠突破升呢目標半球。

平走一注匯豐(0005)套現

年尾通常習慣將D平手坐貨套現，賺得多果D減返注開心下費事跌咗得個恨。個市睇黎都係29000左右上下波動，增加返少許現金，睇下有無得短炒博2轉。

匯豐(0005)之前高追博佢上80+短炒下，點知道摸頂買入一揸就半年仲收2次息，今次走貨賬面計平手輸少少手續費走，年尾埋數賺個利息仔。呢次止賺資金睇位慢慢轉部分去中石油(0857)，希望下年有得收割。

今年暫且收爐，休息下。

股市講估 @ 2017下半年

今年香港股票市場發生乜事大家都肯定有所總結，最矚目應該係HSI升到去歷史第二高位3萬1千幾果下，其次應該係騰訊升到爆燈。

呢次升市一直托住幾隻大價嘢上，呢個情況唔止香港，歐美亞洲好多股市都一樣。主要原因相信係因為縮表預期下，錢冇多到而且少左，但大行都要炒先搵到食，就孤寒地集中炒幾隻野。有D股未點郁過，今次會唔會真係一直只炒升緊嘅，唔郁嘅一直唔郁？ 講真唔知，但機會相信會低，因去到最後始終同風險有關，除左無蟹貨果D(如700)，其他大價股狂托始終有風險。最後托未郁果D，低風險，大戶都會考慮呢幾點。

大環境係進入加息周期，停QE同加息開始，有兩範都要留意，一個係銀行股，一個係保險股，兩範都係靠食息差，黎緊係會實在地有業績改善，當然好多已一早炒起。美國預期加息加到2020年，呢口價見頂未就真係見仁見智。

呢次升市，匯豐(0005)算較落後，隻野唔聲唔聲陰上，最近平保仲增持到5%以上(幾年前係匯豐持有平保，去美國玩出火撲水賣鬼咗，十年河東十年河西)，呢隻野係香港人情意結，真係繼續上見紅底時就要開始小心。油股已見左底，未算炒上，欠一點消息(等"當勞哥"係中東搞搞震)。

港股下年升跌，睇美國稅改後外資走速同北水個pool，下年先係財富轉移大風浪嘅開始。

今日好句005

1.德州一所小學老師問同學:''圍欄内有9隻羊，其中一隻羊跳欄出逃，現還餘多小？"所有同學都答8隻，只有一个説"一隻也無剩"，老師向那學生说:"你不懂數學"，學生向老師説:"你不懂羊"

2.投資成功的關鍵是在一家好公司的市場價格相對於它的內在商業價值大打折扣時買入其股份。內在價值是一個非常重要的概念，它為評估投資和企業的相對吸引力提供了唯一的邏輯手段。內在價值的定義很簡單，它是一家企業在其餘下的壽命中可以產生的現金的折現值

3.當市場下跌時，你輕易的將好東西打折變賣，但是一旦市場向上，再想買回來，卻很難。

4.華爾街是惟一的坐勞斯·萊斯的人向那些乘坐地鐵的人徵詢意見的地方。

5.「不要把所有雞蛋放在同一個籃子里」的謬論是錯誤的，投資應該「把所有雞蛋放在同一個籃子里，然後小心地看好它」。

恆指3萬點 賭股三年高 2018年澳門樓 - 百花齊放

澳門近10年，樓市翻天覆地，2014年樓價登頂之後，1年時間跌40%不為誇張，3年之後到今年2017，又翻返去歷史高位的85%左右。

（海一居）事件後，一堆市民叫苦連天，本人認為呢班投資客輸打贏要不值得可憐。海一居發展商保利達，最近係附近又開始推佢個新盤（海上居），開出黎意向尺價大概9500。港珠澳大橋就快落成，到時候或者會吸引一班投資客入場。唔想買新樓怕發展商溢價想買半新樓，附近龍頭屋苑無疑一定係（海天居）@2013年入伙，當年2xxx樓花價，投資移民實力持貨，而且當年無乜地盤開工，慢工出，素質一流，當然都唔平得去邊。

隨著澳門賭收增加，全澳屋苑業主叫價開始上升。但2017落成可以賣的新樓，全部清一色叫9xxx一尺。呢口價係大莊家定價，睇黎已經有默契，在此形勢下舊樓無可能超過呢口價了。但澳門二手樓有一現象，就係緊跟平你DD。講真，呢個情況係對面海香港都係咁，但香港有樣野好就係夠透明，而且市民通常對樓有認識，導致級數分好多級，唔似澳門水魚一大堆，加上實際有錢人唔多，基層中層相差不大，大概只係分得4級每級1000蚊一尺差價，如果唔做D功課當買菜，隨時俾業主標一野，就現在經濟形勢，想10年翻身基本無望。

“投資大神老巴講得o岩：  能避開麻煩，相比有能力走出麻煩更好”

增持中移動(0941) + 太古B(0087)

最近呢2隻野都跌得好慘烈，增持少少溝淡下。
不過都係一溝即坐格...hahaha

好似成大半年都未試過呢種越低越買嘅感覺。
對上果次有呢種感覺，係中海油同中石油。
經過半年硬坐，暫時呢2隻石油股賬面有些許利潤。


最近大市有個小調整，其中一日跌成6百幾，當日牛軍尸橫片野。
討論區感覺上好一部分人都轉為觀望但仍然偏好。
估計跌多一千幾百點散戶先會驚。

匯豐比平保增持到5.01%，難怪近10日北水高額買入。

Blogger界都有部分人開始獲利Hold返Cash。
突然想起某blogger係篇文講某大師名言：
如果你以大眾為參考，那你水平也與之相若 (大概係咁上下...)

持股再創新高，維持既定方略。
Cash(8%) VS Stock(92%)

買入中信國際電訊(1883) + 止賺一注中海油(0883)

建倉買幾手擺下先@2.12，有6厘幾息，澳門CTM 99%股權。

溝太古溝到窮，止賺一注(+19%)中海油(0883)增加現金牛先。