年結 2018

話咁快又一年，睇返上年記錄嘅股市足跡( 2017總結 )感觸良多，往年大市順豐順水，今年被動挨打，慶幸根基打得穩今年力保不失，不過明年就難有咁幸運嚕。

今年股票埋數"落袋計"，連埋股息同比增加 54.1%，其中股息占總收入 35.9%，而股息對比上年增加 13.2%，買賣VS收息大概都喺維持6:4左右，雖然今年市道唔太好，但今年成績表反而喺歷年表現中最好嘅一年，多得中海油(0883)今年嘅神勇表現。現手上仍然持有匯豐(0005)、中石油(0857)、長實(1113)、長和(0001)、滬深300(3188)呢5隻悶股，希望能夠挨過中美貿易戰呢場大龍鳳。

股票呢樣嘢，無信念真喺好難贏，升揸唔穩，跌揸唔住。經歷2017同2018大上大落之後，我發覺寫諗法好重要，但偏偏份人好懶，希望下年可改之。

澳門樓市方面，仍然維持2017觀點，睇2019有無機會執平嘢，部分首期已經擺落銀行定期候命，今年銀行存款開始有可觀嘅利息，同前幾年比簡直可以話係差天共地，本地2間大嘢都出Plan半年2.88%~2.89%，對比買樓收租呢樣嘢，如果樓唔升就已經無意思了，或者我覺得打理太麻煩唔值罷了。而且對比三個月前，已經明顯向下調整10%，但只喺返年頭水平附近，睇黎我又可以繼續喺班Tea友到繼續"牙插插"。


知命者，催吉避兇，保存實力，待時而起，順求利、逆求存。

增持 長和(0001)

英國不確定性睇埋呢個禮拜大戶有乜解讀。價錢吸引，新低位增持一注。

呢個月短短10日，個Pool跌到新低，準備年結。

清倉 MGM(2282)

中美暫時延遲開火日，HSI今日收市都升成675點。今年好多基金都輸到趴曬喺到，年尾因為中美戰事暫時休息，基金粉下個窗都勇D，估計基金起碼過埋今年呢幾日，下年再各自修行。年尾睇好，短炒可以博下追追貨。

今日趁MGM(2282)升成13%出埋貨尾無眼睇，最後呢注賬面唔計手續費虧HKD1,000。年尾我都要整返靚個Pool。手上得返5隻股票陪我過聖誕。

止賺一注 MGM(2282)

上個月入咗少少MGM(2282)，止賺收返少少Cash幫補下午茶錢。

今日港股成交595億，加埋朋友說今年俾大C串到無聲出嘅英Sir用佢Run隻基金3%買咗12月Call，搞到我對後市睇法有保留。

匯豐今年最後一次收息已經袋袋平安，同時手上持貨可以收息嘅都收曬嚕，用上年度收息粗略計同比增加13.2%。匯豐(0005)繼續係收息龍頭貢獻其中39.6%，然後喺已經沽清嘅中海油(0883)占21.7%，呢2隻已經占6成。下年收息除咗大象外，加入長和(0001)同長建(1113)，期待表現。

沽清 嘉華(0173)

上禮拜5，恒指爆上1,070點，D乜10年啊N年啊嘅記錄出曬黎，的確我印象中升成千點已經係08年果陣嘅事，耐到好似喺銅鑼灣希慎廣場地盤天秤跌咗落黎嘅果陣嘅嘢，當年仲係公司望住同D同事嘰嘰喳喳。

早2個禮拜買咗少少嘉華(0173)，其中一注好彩撈到底，今日食胡執少少跌市安慰獎走。

增持 中石油(0857)

呢幾日股市過山車，10月跌2千幾點呢三日升返一半，尋日中石油出業績報告，兼中期息收息日，加上見個股票倉去返綠色，時隔10個月，再出手買入中石油(0857)。

匯豐(0005)同長實(1113)近呢個禮拜跌到好得人驚完全唔敢撈，點知就噤就上返曬。長和(0001)就無眼睇喇，跌就跌凸升就瀨屎。MGM(2282)今日跟住賭股爆升10%+，好彩上禮拜買咗注叫有得開心下。滬深300(3188)睇黎大陸出政策見短底25xx，開始有D力，連平保(2318)都擺埋出黎話回購最多10%，但小心啊爺喺齋up唔出錢。嘉華(0173)有注買到個底，賬面微利算喺股災中一點安慰。

最近仲follow咗網絡紅人Dr.Ng，睇民眾財經覺得佢講嘢有氣場，最強淡友非佢莫屬，大師睇黎要小心位置被取代。

另外C永清都出文話希望樓市唔好跌超過3成，自己聽落覺得弦外有音，供過5厘息以上嘅人都基本係40+，後生一代現在喺有實力，但最怕係息魔喺你唔掂果陣踩一腳，呢個世界喺.......越窮越見鬼。

增持 MGM(2282)一注

MGM(2282)今日又破底，昨日增持了一注博佢唔破底，點知一買即蟹。

嘉華(0173)大股東上禮拜有動作回購，暫時2注都略有小盈，大跌市下估計都唔升得去邊，目標HKD3.8到咗考慮走貨，好耐未發過市，等呢塊小肥肉養多陣先。

匯豐昨日大升5%，印象中好似好耐之前喺無線新聞到見過呢個數據，不過已經唔知幾多N年前。公佈業績數據比大行預期好DD，居然可以升成咁，我覺得E+個市錢還在，問題在於個個都唔知追乜好。反彈拐點未見，但好消息D股票都肯彈下，最惡劣情況未到。

增持 匯豐(0005) + 長實(1113)

啊爺早2日唱好升返日，大戶沽返2日破埋2萬5，繼續增持匯豐(0005) + 長實(1113)。

個股票倉賬面計，月頭仲有成8%綠色利潤自J，今日開始見紅.......

增持 匯豐(0005) + 嘉華(0173)

個市跌到無底一樣，如果乜都唔做，萬一觸底就會得個吉，所以又唔可以咩都唔做，為咗應對最壞情況，已經唔可以好似之前咁1蚊增持一注，唯有改變策略跌2蚊增持一注，收市前策略增持一注匯豐(0005)。友人問點解唔買盈富基金(2800)係要堅持匯豐？其實好簡單，以前買過盈富同港交所(0388)，雖然知道佢喺好嘢而且買得算平，但就喺唔知點解揸唔住，反而大象派派下息就揸住咗，一季收次息嘅感覺的確幾爽，心魔嘅嘢實在好難解釋。

嘉華(0173)市值跌穿100億，個人認為股價已經進入甜區，暫定每跌7%策略增持一注。

蔡楓華 - 投資路上的靈魂共鳴

蔡楓華(Link)，有返咁上下年紀嘅應該會熟悉佢，唔熟嘅都可以Google下，一首" 絕對空虛 "加上一句" 一時嘅光輝，未必喺永恆嘅 "，成為年代經典。

寒冬已至，價投路上，" 絕對空虛 "(Link)特別有共鳴，或者正正好似坊間所講，呢條始終喺小眾嘅道路，得閒J下呢首歌希望可以鞭撻到自己。

" 一時嘅光輝，未必喺永恆嘅 "(先唔好理咩曼德拉效應)，經歷幾次股災大難不死，今年股災反而沐浴春風曉飛一樣，得閒J下呢句希望可以警惕到自己。

感謝蔡楓華！！喺荃灣給我靈魂震蕩的一晚~

建倉 嘉華(0173) 策略增持長和(0001)

琴日股災跌千點，今日回返你500，當我喺黑E咩.....

建倉買入嘉華(0173)一注，呢隻股年頭曾經考慮過買入，當時目標喺HKD4.05就建倉，可惜跟住爆上唔成事，今日收市前喺HKD3.38買入算喺完咗個情意結。雖然喺香港唔算特大發展商，但喺今年出手入標幾塊地都夠"Long Say"(狼4)，我中意。

長和(0001)已經跌到上次一路買入嘅最低注位，習慣上呢嗰位開始，第二輪策略增持開始。

沽清 惠理(0806) 加注長實(1113) + 滬深300(3188)

股災跌成千點好耐未試過，趁勢落決心沽清組合第一重虧股惠理(0806)，策略加注長實(1113) + 滬深300(3188)，繼續增加現金同換貨。

幾次股災經歷，唔想左完一巴食埋右一巴，一定要換返D貨唔好揸曬錢。

沽清 中海油(0883) 買入 長實(1113)一手

中秋同國慶之後，啊爺話15號降準1%都頂唔起個市，個市喺呢個位，有D錢真喺唔到我呢D散戶賺。

既然壞消息咁多個市都喺跌得咁少，買一手長實(1113)溝溝佢跟大公子種下樹先。澳門國慶數據叫有增長，但賭股繼續無運行，MGM(2282)又覺得未見底，睇定D增強下信心遲少少再考慮。

中海油(0883)趁今日反彈，沽埋最后一注貨尾費事成日心掛掛。短炒有時真喺做多賺少，合埋眼掉喺到反而喺好事情，今年大豐收全靠呢隻單天寶至尊。手上仲有中石油(0857)同匯豐(0005)呢2隻主力喺到猥瑣發育，北水近日都有密密收，希望下年有運行。

回想當日重注中海油，一樣喺個市壞消息滿天飛，到價買入後一定要有信心坐貨，唔好俾所謂嘅年回報率呢種心態框住，警惕以年為單位嘅短炒行為。

下面喺今年中海油嘅心路歷程數據記錄：

走貨 長建(1038) + 平安好醫生(1833)

今年5月開始買入長建(1038)總共買得4注，收過2次息夠食幾次下午茶，長建喺好股票防守能力好強，但呢個時勢唔知點解好難敢落重注去大注買，眼不見為乾淨一次放曬，現金留返俾長實(1113)算，這或者喺我鐘意有大老闆回購嘅股票較多。

之前貪得意走去抽咗手平安好醫生(1833)，輸幾百順手放埋無眼睇。

匯豐(0005)又準備除凈，加埋11月收埋中海油(0883)同中石油(0857)嘅股息，估計今年全年比上年多收12%息，今年中海油出得7788，為下年收息稍後要部署返D收息股先得。

止賺一注 中海油(0883)

中海油(0883)今日食屎咁上，原本按【風清散貨心訣】打算HKD15.00放嘅，訓醒開apps睇果陣已經上到HKD15.50咁無理由唔放噶，下注喺最後一注，目標HKD16.00。

長實(1113)今日跌一跌，睇o下下禮拜有無機會入返D先。

香港銀行加息，雖然用開間喺加0.125%，不過活期已經喺多咗125倍，好感動終於唔使收息收幾蚊喇。定期1個月1.00%，3個月有1.75%，6個月有2.00%，今日做咗1,3,6個月嘅定期，綁定D資金費事手痕亂用。

繼續增持 匯豐(0005)

成日吹加P，不過未加P 銀行就加定期利率，今年我都做咗張半年定期@2.1%，對上果次做定期都已經係9年前嘅事喇，呢幾年簡直係揸Cash嘅噩夢，一球擺銀行活期得10蚊嘅日子要過去了。

細嘅財務公司好似Aeon(0900)一講加息都好正面股價GoGoGo，大銀行就玩反高潮，又或者係之前升得太快？繼續買上，昨日增持匯豐(0005)一注，睇班大戶點演繹加P。

澳門 買樓租樓 反思

近期友人因小朋友問題考慮置業，得幸有機會貼市一次，重新思索樓作為投資或自用嘅問題。


首先，澳門樓市玩法喺MOP800萬樓下嘅樓，可以做80%按揭( 上年按揭玩法喺MOP600萬樓下做70%，MOP600萬 - MOP800萬做60% )，MOP800萬以上則只做50%按揭，其他同香港相若。此政策下澳門樓價今年無視賭場股調整繼續升唔少，大家都心慌慌怕第日買唔到樓。

增持 匯豐(0005)

策略買入匯豐(0005)一注。

中美互片對方關稅後個市開始爆上，究竟係之前跌得太多，定大戶要拓高沽貨，要觀察多段時間先可以確定。

長實(1113)公佈，+X哥哥同大公子近日不斷買入，短短一個禮拜由低位上10%+，個價位硬到跟本唔比機會散戶買平貨，追唔追真係考"膽識"。

中人壽(2628)重新納入觀察名單。呢隻嘢今年年頭幾乎摸頂買入，之後斬倉輸我12%，睇下有無機會今年報仇先。如果怕中人壽升得慢，可以考慮滬深三百(3188)。

賣出 MGM(2282)

賣出早幾日買入嘅一注MGM(2282)，賺個下午茶食下，仲有一注艇貨繼續坐下。

今日美國佬公佈2,000億關稅先10%警告下，個市只係跌少少，我怕大戶玩套路，扮無嘢癮下班散戶，過2日先劈低個市。

呢個月有長和，長建，長實收息了...仲有匯豐係月尾派，算喺跌市安慰獎。

止賺一注 中海油(0883)，買入匯豐(0005) 美高梅(2282)

今日股市成交1,063億，升669點(+2.54%)，屬2年來升幅之巔。


同日由於油價造好，中海油(0883)收市HKD14.72( +0.56 / +3.95% )，股價方面已經破今年前頂HKD14.62，計埋股息(HKD0.3)實際已經等於HKD15.00+，維持上一貼看法再止賺一注中海油。餘下還剩2注，計劃每上多HKD0.6就放一注。

另外持有嘅中石油(0857)今日收市HKD5.94( +0.282 / +4.98%)同日除凈股息大概HKD0.1，計今年高位HKD6.6左右仍有距離，對比中海油跑輸，但跑贏HSI。

獲利一注 中海油(0883)

中美貿易戰，股市越跌越有，組合中嘅王者中海油(0883)反而逼近今年高位HKD14.60。經詳細考慮決定割草走貨，放出2017年5月開始持貨至今嘅倉底貨。做此決定原因有三：

止賺一注 中海油(0883)

股市最近跌到啪啪聲，散戶一殼眼淚。本應係買貨時機，但今晚美國好大機會會公佈對華貿易制裁2000億落實細節，所以都係忍一忍，明日再算。

今日將本年度買入的中海油(0883)全數放售@HKD13.44，埋數小賺(未計今日除凈)。呢次注碼控制得唔係太好，上面買得太多，下面唔係幾敢買，要檢討下。
- "5月至7月均有買入，最高買入HKD13.90，最低HKD12.30，平均HKD13.10"

投資大師名句收錄 - 網絡篩選版

明嘅自然明，有則改之無則加冕....

一、股神――巴菲特

　　1．要在別人貪婪的時候恐懼，而在別人恐懼的時候貪婪。

　　2． 只有退潮時，你才知道誰是在裸體游泳。

　　3． 當一家有實力的大公司遇到一次巨大但可以化解的危機時，一個絕好的投資機會就悄然來臨。

　　4． 擁有一隻股票，期待它明天早晨就上漲是十分愚蠢的。

二、金融大鱷――索羅斯

增持 長實(1113)

股市越跌越恐怖，策略增持。

增持 惠理(0806)

含淚增持惠理(0806)，呢隻嘢係組合內虧損最犀利嘅股票(-34%)。

大象(0005)今日除凈後繼續跌，破HKD70心理關口，後市繼續睇低一線。

長和(0001)有北水買入，呢個星期好硬，下禮拜就唔知了。

愚見，或者要到大家2017年賺嘅嘔凸，大市先見底。本blogger 2017囂幸贏得而未獲利，剩餘賬面利潤已經跌落10%樓下。係繼續去馬定係留低挨價，估計去到接近2%·3%先係最痛苦選擇。

買入 MGM(2282)

今日返兜MGM(2282)，貪佢幾日跌一蚊，短炒食過返尋味。

後日匯豐(0005)除凈，考慮再買入D，將個pool湊個齊頭收息。

長和(0001)今日都好威，近期出奇地強橫，唔通有D乜好事有春江鴨？

路人A話E+感覺上有D似2015年大跌之後嘅陰跌，我個倉唔係呢次風眼位，暫時無乜感覺。不過唔少blogger好明顯已經收皮，後市值得警惕。

......黃國英話齋，塘水滾塘魚。

短炒走貨MGM(2282)

上星期5走貨MGM(2282)。呢期個市係咁跌，食個雞糊安下神先。

今日教育版咁樣俾人沽法，難道係大戶提示，終極一跌序章？

增持 長實(1113) + 首注MGM(2282)

長和(0001)昨日特然俾人咁買上去，最多升成HKD4。有D似太古B(0087)年頭果下彈一下，估計之前HKD80附近就算唔係大底都就快會見。長實(1113)同長和公佈業績算幾好，可惜個市唔多受樂，見長實未跟住長和上，買返少少睇下會唔會過幾日跟風後上。

MGM(2282)最近上上落落，博個短炒。

匯豐(0005)公佈業績受大行單單打打，如果換股價係HKD72附近，呢次我會揀股票。

增持 華夏300(3188)

人仔呢期跌得好甘，啊爺手影一隻手指都唔見，證明啊爺唔係匯率操控國。股市都只係暫時見啊爺係到打嘴炮，個個都想知啊爺幾時俾D顏色班沽貨佬睇，作為小估民的我，繼續食花生逢低吸納。

星期五溝返手華夏滬深300(3188)，如果再跌6%，會再增持。上證2700附近，幾次股災都係啊爺爺大底，睇唔到啊爺會大平賣，指數比較容易粉飾太平，個股當然除外，大家睇路。

1話. - 斯托克代爾悖論(The Stockdale Paradox)

近期股市波濤洶湧，機緣巧合睇到呢個故事，思考下自己係咪太樂觀先~

個人覺得，似某兔領導講：【前途是光明，道路是曲折】個說法。

斯托克代爾悖論

斯托克代爾悖論(The Stockdale Paradox)

　　斯托克代爾悖論的要點：對前途充滿信心，但又直面殘酷的現實。

　　堅持你一定會成功的信念，同時，要面對現實中最殘忍的事實，不論有多大的困難，不論它們是什麼。

建倉 長實(1113) + 華夏300(3188)

長實(1113)係HKD65果陣已經想入，點知一輪中美貿易戰發酵搞風搞浪嚇到大家都縮，呢2日長實碌到落HKD60同長建(1038)睇齊，買返手擺下先。

華夏300(3188)，買入原因簡單，跌到落40咗右已見支持，HKD42買少少擺下博上HKD45。

中石油(857)今日派息，又俾啊爺抽10%水，唔係太開心，不過話時話原來我對RMB派息嘅股票，佢係用除凈日嘅匯率計港幣 or 派息日嘅匯率計港幣俾返我呢? or其他中間日子係完全唔G。以前匯率穩定陣無諗過呢個問題，但最近呢個問題就好凸出。

增持 長和(0001) 匯豐(0005)

全世界睇7月6號，我近視唔睇咁遠，今日入返D貨壓壓驚先.。

匯豐(0005)對上果次買入已經係4月4號，今次跌破上次買入價，例牌溝下。

長和(0001)都跌到好殘，穿HKD80睇黎指日可待。

華夏滬深3球(3188)越睇越吸引，睇下上證2,700係咪啊爺底線先。

增持 長和(0001) 惠理(0806) 中海油(0883)

近日大市跌得好應下，港股無運行，還好重災區我無份，勉強叫跌少過大市。


近3日分咗注買咗下面幾樣嘢：

惠理(0806)呢個無底洞唔知要跌到幾時，唯有溝一溝。

長和(0001)都跌得莫名其妙，唯有繼續跌2蚊左右買一手"價值投資"。

增持中海油(0883)，原因好簡單，紐油油價繼續破頂，如果唔係個市唔爭氣，應該可破15蚊。


另外加入華夏滬深300(3188)入觀察list，之前話入乜入7博升班友已經嘔凸，係時候執煙頭。

策略增持長和、長建 & 中海油

策略增持長和(0001)、長建(1038) & 中海油(0883)。

+x哥透過基金3日連續增值長實(1113)平均HKD65左右。根據過往經驗，半年內就知誠哥智慧準唔準，手上無貨食住花生等結果，將長實放入list觀察隨時建倉。

增持 長和(0001)一手

今日長和(0001)低見HKD89.55(-2.000 / -2.185%)，下禮拜去旅行放鬆未必得閒留意股市，買返手擺下先。

之前最低見HKD87.10，如果再見一次，呢個位附近會大注一嘢。

增持 長建(1038)一注

連長和(0001)都開始發力上，臨收市買一注，持續吸入優質股票長建(1038)。

金金同特特今日開會全程跟足，消磨悶市時間一流。

增持 長建(1038)一注

增持長建(1038)一注，市場消息話競購緊大英帝國垃圾發電項目。唔理佢成唔成，反正記得+X哥退休前話有幾個大project傾緊，看來有風聲了，買D壓下驚先，費事有好消息唔夠貨係手自J。

長和(0001)呢2日開市成交好似好猛，難道有咩嘢準備發生？繼續睇住先。

5月記錄

買入：小注長和(0001)同長建(1038)試水溫，賬面虧損分別約(-3.5%)&(-6.2%)。另外早前油價跌陣，博反彈買注中海油(0883)都艇到無眼睇。今日再策略增持長建@HKD59.10一注。

賣出：分注賣出部分中海油(0883)，最後口價去到HKD14.50，下次賣出目標價係HKD15.00。

股息：長和(0001)同長建(1038)收息坐艇，加埋惠理(0806)含淚收息，都夠下月去個短線台灣遊，下次收息期係7月，有大象同2桶油。

執筆一刻，股票賬面環比增長( -HKD3,394 )。

暴跌中買入中海油(0883)

尋日中海油(0883)收市跌落HKD13.64 (-0.88)，一日唔見接近成蚊。買入幾千股@HKD13.80博下反彈，睇下遲D去旅行前有無斬獲，希望可以幫補下機票，目標價HKD14.30。

雖然尋日跌市，連帶中石油(0857)受傷，不過油價唔算大跌，繼續持有等運到。

年頭追風惠理(0806)尋日派息，本年最失敗投資可定係呢隻嘢，一月明知呢隻嘢貴都仲敢大注追，可想而知一月市場氣氛幾熾熱。結果說明一切，道行未夠需要繼續修行.......

Check Point - 紀念閑文第100號

千山鳥飛絕，萬徑人蹤滅。
孤舟蓑笠翁，獨釣寒江雪。

浮沉首10載大難不死，續命3年力保不失，共勉之~

繼續走貨中海油(0883)

中海油(0883)股價今早高位觸及HKD14.64，按【風清散貨心訣】每升多過上次放出價HKD0.5放一注( 終於放到上年買入嘅貨底@HKD9.04，差幾日就夠擺咗一年，賬面獲利約 +60% )。原本諗住擺係到收下息，但近期咁升法，真心忍唔住唔獲利，唯有繼續含淚走貨。

琴日中美貿易談判達協議，其中路邊分析中國會加大進口美國石油資源，估計以美國姿態，日後要貴賣係可以想象。幾個大國係伊朗果邊又多動作，沙特果邊又危危呼，夾高油價照顧小弟沙特阿美上市，符合美國同沙特利益。油價唔可以睇太淡，有貨要放，有大調整要夠膽入應該係今年投資策略重心。

股市日記 - 中石油(0857)都爆上

2018/05/18上午成交

今日股市呢幕，石油股絕對有鏡頭，中石油(0857)報HKD6.49(+0.37 / +6.046%)，唔睇市況仲以為係牛3添~，印象升得咁誇張又真係好似係牛3尾段。

多得咁樣升一升，我個pool又漲咗DD。呢隻嘢都橫行咗好耐。對上果次上到呢個位係今年1月果陣，但係好快就跌返落去，印象好似跌到去HKD5.2附近。

長建(1038) 買一注入場食花生

誠哥就係多好嘢，決定要跟誠哥走嘅，唔儲佢幾張金閃點得呢？買注長建(1038)先，下隻係長實(1113)。

再獲利一注中海油(0883)

中海油(0883)股價高位觸及HKD14.04，按【風清散貨心訣】每升多過上次放出價0.5放一注，短短一日再次鎖定利潤@HKD14.00，下次目標HKD14.50應該無咁快喇呱，如果放埋今年買嘅貨就無曬，再黎就要出D倉底貨，唔係太捨得。睇返記錄呢注係4月頭買入@HKD11.10，當時記錄心態係博個下午茶，又真係一個月唔夠就博到。

獲利一注中海油(0883)

美國特仔話退出伊朗核協議，琴晚油價坐咗次過山車，俄佬，中東果邊睇黎吼咗呢次大茶飯好耐，美國佬出油又唔大可能賤賣，基本面無大變化，繼續評級油價不宜睇淡。

中海油股價到HKD13.5，按【風清散貨心訣】每升多過上次放出價0.5放一注，鎖定次利潤先。今次間距20日(上次係2018/04/19)，比上次要2個月快D。今日中石油(0857)都爆上HKD5.92(+3.86%)，難道開始追落後？最貴果注係HKD6.4買，目標HKD6.7先開始放。

增持 長和(0001) 一手等收息

上禮拜抽完平安好E(1833)，抽到一手第二日就坐艇，擺返佢一個星期睇下有無起色，無就斬咗佢。 (少有幾個股友仔都一齊抽全部都抽到一手，結果得一個暗盤賺住走，其餘全部坐艇，哈哈哈)。

凍資退返黎今日手痕，set多手長和(0001)@90.65，下午又真係入到。根據我多年買股經驗，我入新嘢之後，通常係賺息輸價，睇下呢次燈力勁唔勁先。

長和末期股息HKD2.07，2018/05/15除凈，派送日2018/05/31。

匯豐(0005) - 業績公佈後一點想法

前日大象公佈業績，市場一面倒睇淡，跌成HKD2.75@74.95收市，未去到稍前72.x個低位。香港繼續係收入主要來源。

新老闆范寧上任後暫時睇黎動作唔多大。今次成績差據公佈係因為第一季支出增長大過收入增長，大家都將呢個睇成亮點。係呢點到，首先分2方面睇，第一增長係有。第二開支無減，但呢到公佈嘅開支係持續性定一次短期性就有文章了。

2018年只有20億回購，市場散戶繼續負評居多？

不過，係我睇上面呢D都係雜音，基本利息預期向上，就算你班按揭夠綁期轉plan，但點睇之後對盈利始終會有帶動。好多人話食老本唔掂當，派息難以為繼，但繼續keep住派USD0.1我又覺得ok，好過長和(0001)賺咁多都係派果DD。玩法唔同啊嘛，或者我咁比喻，就好似金沙(1928)同銀娛(0027)，鹹魚白菜各有所好。

結論，基本面變化不大，繼續持有，跌穿72繼續收集，繼續收息。(佔股倉30%)

另：老巴開完股東會，上網睇下分享先，繼續增強自己持貨信念。

澳門 - 海上居 參觀有感

近日同fd去睇咗5座42樓示範單位全層。全部開放式or一房，戶數由A去到M，4部Lift。

區分環境問題不作討論，以下個人觀點，唔構成任何要約之類：

優點，向大陸方向無敵遠景，高過30樓有種君臨天下之勢。私密度都算幾好唔怕樓望樓。部Lift底高有冷氣，部電視放Lift門上方便低頭族做下上昂運動。

今日跌500點陣，買入長和(0001)試水溫

今日無喇喇跌幾舊，買入長和(0001)建倉@91.65，年頭100蚊果陣已經吼住，高位都跌超過10%，計劃每跌5蚊入一注。

油股早上重災區，Set咗口價差2格太進取入唔到。繼續陪沙特，俄羅斯一齊癲。

四月記錄

4月份放出3月買入嘅中海油(0883)獲利少許放出。買入一注中海油(0883)@HKD11.1同兩注仔匯豐(0005)@HKD73附近，暫時賬面都賺緊。

組合內油股佔比一半有多(下個月再升就開始策略減磅)。匯豐3成+，惠理(0806)繼續坐艇。

本月納入觀察組合: 0001 , 1113

S : C = 8:2

按揭息率 - 溫水煮蛙局下半場開始

月前政府一刀800萬樓下可以承造8成按揭，令到市場好多上車人士因按揭政策可以上車，樓市短期上升。問題係原本唔夠料上車嘅上到車，原本剛好夠上車就上多一級(4人車變7人車)。呢班友唔係因為自身能力提高上車，第日市況扭轉一定首當其衝。

獲利一注中海油(0883)

NY油價上到68.8，上次HSI高位3萬3果陣，中海油最高13.5左右@油價65，大市場同之前相差亦10%，抵消一下現價13.1符合【雲淡震蕩估值】。

按既定策略【風清散貨心訣】，每升多過上次放出價0.5放一注，鎖定一次利潤。原來上次放已經係12 Jan嘅事@12.5。

最近好熱嘅"佛係"系列 - 佛係收息投資法

不買5%息率樓下股票                 不考慮記錄不良公司
不理會當炒消息滿天飛熱門股    不在意買入後升升跌跌
不關心所謂嘅新聞報道               不輕易賣出持貨
緣分到了        自然有息收

利申: 持有匯豐占個Pool接近 30%

貿易戰烏雲下 繼續入貨

中美貿易戰係到係咁吹風，繼續增持 匯豐(0005)同 短注中海油(0883)博個大Tea，中銀香港(2388)進入觀察名單。

近期與部分友人談論市況，其中走火入魔繼續走火入魔，傻更更就繼續傻更更，傾唔埋欄繼續傾唔埋.....and其他。價投班友基本開始走貨Hold Cash，而且比例都開始接近50/50，一般散戶我觀察則還未大舉入市仍在觀望，現在繼續殺班投機派上上落落，政治市風高浪急，機會......係有。繼續慢慢放線，釣大魚。

三月記錄

呢幾日買咗少少匯豐From 77 to 74。高位85跌落黎都over 10%了。

公佈業績前增持一注中海油@11.72，即刻坐艇。
不過中海油買夠貨估計今年內唔會再加注了。

以後都係月出記錄，次次update覺得好繁忙...wakaka

增持雙牛 中海牛(0883) + 中石牛(0857)

對上果次買入係上個月，又係時候月供投資法。

含淚增持 惠理(0806)

之前大升市博炒上，近10蚊邊重貨，現在含淚買返少少溝一溝。

增持3 匯豐(0005)

繼續買，每跌0.5買一手。睇大戶沽到我Cash見底定我買到見底。

增持2 匯豐(0005)

匯豐控股早前宣派去年第四次股息每股0.21美元，集團公布，採用以股代息選擇而發行之新股市值為每股10.0177美元(78.6左右)。集團將於4月6日以英鎊或港元派發現金股息。

呢2年匯豐派息價同股價係三兩個月內都相差唔多，但呢次少咗回購利好，或者股價會繼續受壓多排。根據規定，匯豐集資之前唔可以回購，半年睇，匯豐將會有一個利好因素發酵。現市況買其他股票跌得仲金，再買多手@76.5壓驚先。

增持 匯豐(0005)

買2手過下手癮。目標83

增持 中海油(0883)

11蚊樓上無貨，買少少擺下。
中石油組合微虧，中海油組合賺少少。

出貨 東方海外(0316)

2月大跌市時買入少少東方海外(0316)，賣出定定驚先，賺返個下午茶，費事成個2月股票都係輸。

除夕 半日市 - 增持中石油(0857)

升返上我全倉買入平均價，就係呢個位買少少擺下先，費事新年後黎個大升市，之前放咁多貨變相浪費機會成本。

地鐵(0066)因為美國債息關係暴跌，萬一美國債息返返落去，呢隻嘢就係機會，加入名單留意下。

招商港(0144)，今日set咗價入唔到，RSI(28日)已經跌穿30，而且呢隻嘢PB唔高，新年後再睇位部署下先。

倉位去返60%

新年快樂！

增持 中海油(0883)

2年來第一次係10蚊樓上增持中海油(883)，之前出唔少貨，買入少少擺下先。

澳門 - 樓市平入機會到

澳門政府苦口婆心出曬口述話出辣招，近日終於出爐。

放寬按揭成數 ( 詳細自己上網搵 )，300萬加多10%變330萬唔係咩大事，班草根仍然糾結果10萬8萬。最攞命係800萬可以借8成，呢下配合今年推新盤，正官商合作典範。以前首置貸款，衰咗政府上身，呢下將個波推落銀行體系，借多你嘅事，好多人話銀行有壓測，不過銀行為咗做生意，職員台底招教埋你點破，例如擔保人啊，借錢裝修啊，5花8門理由多的是。係低息環境下個個都睇眼前話自己供得起就係無首期，但美國話加息放下風就股災都吹埋出黎，都唔計下萬一加2%，後面借住幾球嘢，自己頂唔頂得順，真係當自己年年+5%人工咩，政府今年2018都係加2.4%咋。不過又咁講，政府的確係幫唔夠首期嘅人上車，但無話包你買咗唔仆街，自住都係投資，風險自理。

第二間物業額外遞增稅，簡直係搞笑，香港一嘢就15%，澳門居然搞個5%之後10%。傳聞金峰4期出招前賣得好旺，有興趣朋友去查下查屋紙，就知道咩人收風最快，或者有幾個新業主名你可能認識都唔出奇。

其實澳門有外匯管制，外水根本唔會吼澳門呢個細市場。現在班商家佬根本係塘水滾塘魚，騎劫扭曲個政策，將大陸賜給本地市民的財富用樓吸走，行香港舊路改版。不過又咁講，你願買無人用槍指住你，每個遊戲都有佢規則，錢最後終會落入聰明人口袋，總有人脫穎而出，無背景無靠山嘅人，唯有多思考多忍耐，機會總會有。

但人算不如天算，澳門推新政，居然遇到十年一遇股市大調整。睇黎如意算盤未必打得響。不過無可否認，股災之後 "準買家" 叫價力係會強D，可唔可以平少少買，呢幾個月就係機會，下次唔知等到幾時。唔好誤會，只係平D唔係最平喔~(短時間內人工相對樓價比例係高咗！！)

既然講到樓，順便講下海一居，小心保利達同九龍建業，海一居收咗人首期起唔到，條數未入數，而且對應官司撥備都無係年報提過。股價上落好睇政府點判海一居單野。

恒指跌穿3萬 - 主動部署

呢次 [調整式股災] ，一個禮拜將今年盈利全部吞噬，恐怖過15年果下。2017年利潤都消耗大半，唯有做返D嘢。對上果次賣坐艇貨，都已經係15年果次股災lo...


套現：
1. 怒沽坐咗2年幾聯想(992)，跌穿4蚊唔斬唔得

2. 平走中信電訊CTM(1883)

3. 中移動(0941)，中人壽(2628)，太古B(0087)趁比其他跌得少時沽走套現，補充現金。


部署買入：
1. 買入東方海外(0316)建倉，等收購事成，呢D股呢次大跌跌唔多，等心靈有D安慰。

2. 惠理(0806)跌得最甘，倉位唔大唯有等好消息爆上再算。

3. 石油股明顯調整，而且今次都跌得應棍，上面沽貨資金會部署係油股( 0857+0883 )博返彈。 美國經濟好呢個大前提，油價應該唔會太殘。

盜賊物語 - 現實經常開目標玩笑

上年係哥布林村做任務收穫豐富，加上一月一口氣做咗個Combo任務，有3日時間，距離我本年目標之一 Lv.X00 其實只差2~3個Lv.，原本仲對自己開玩笑，不如等三個禮拜後種樹Task自動完後加Exp湊夠數就算。

之後，決定都係繼續接任務，唔覺意行入新樹林，俾人埋伏搶道具重要被大賊PK，跌返Lv.40，而且現在還要中咗永續毒，唔知道要死多幾多次跌多幾多Lv.先重置。

都係返去睇近排最愛 Overlord

HSI 跌1649點(5.12%) - 狗年未到，做住 【一碌死狗】先

上年賺埋 一個禮拜俾返佢，呢次股災前未見升1000點，先見跌1600點(成交過2000億)，全倉正股都咁L慘。

但我手上D貨係呢次升市無乜點升，跌就跟足。過幾日仲要新年，北水停水，市場呢幾日氣氛負面。

今年開局加倉，估唔到做曬燈。
琴日跌886點，正中意境，[ byebye嚕~ ]，淡友破釜沉舟，呢次贏得靚。

再增持 中石油(0857)

最貴果口係6.4買，見今日平少少，買D溝下。
中石油成為第一大倉。

增持一注 中石油(0857)

中石油(0857)一個禮拜由高位6.6插落6.02，之前高位6.4入咗一注，今日6.1補一槍拉返下6蚊樓上D貨。

一月份恆指大升賺得果少少，二月第一日就嘔返成半出黎。特別隻惠理(0806)，學人玩派息後插落，短期後市有隱憂。

2018 牛市記錄 (I)

此刻，相信大家討論點應該係由上年懷疑熊定牛的問題，轉為討論點係呢次音樂椅或者火棒遊戲中，何時逃生！

牛市，沈大C趣圖。

增持 惠理(0806) + 中石油(0857) + 中人壽(2628)

今日恒指反彈升返成499點，根據本年1月觀察，恆指大升時我個Pool基本係唔會升，要係下個交易日先會追落後。

呢次3槍齊射，首先睇好如果大市繼續成交增加同上升，惠理(0806)遲早會爆，本人最喜歡買呢D股，簡單直接等就得而且爆炸力強。

另外中石油(0857)同中人壽(2628)，純碎係因為有智慧不如趁勢，贏谷輸縮。特別中石油，上年5月開始建倉，到今日其實總計升得2X%，跑輸同期買入的中海油(0883) - 4X%。

由於最近大陸開始出口術，個人傾向大隻股AH會拉近差價嘅分析，因此中人壽由短炒轉為中線持有。

Cash ： 14%

恒指破3萬3後 首次跌300點

恆指氣勢如虹沖上3萬3，近日官方媒體開始吹風話隻牛有D身體唔協調，唔可以只用腳行，要用埋手行咁喔 (原來之前隻牛企咗起身行，下肢行到起曬蹍，上肢掛住篤魚蛋太hea)，市場係咁E跌返1%回應下。

恒指破07年記錄@31983.41

今日2018Jan17，恒指破07年記錄低開高收31,983.41，成交1,782.55億。
個倉今日反而虧損，感覺有點可惜。
先唔講遠，估計新年前成交會Keep住1,500億樓上，新年前後估計可能還會更高。
今年黎緊港交所(0388)肯定會大紅大紫。如果可以調整落250左右，值得持有，買入策略1-1-2-4分段買入，港交所今年真係有買貴無買錯。

估計恒指明日破頂，追貨中人壽(2628) + 中石油(0857)

HSI 收市31904.75，臨收市前入咗中人壽(2628)+中石油(0857)，中人壽係之前入咗少少唔夠貨今日追升，而且一個禮拜唔夠就到咗我目標價。中石油係石油倉因為之前中海油放咗唔少，要補充返D貨揀佢係因為相對還落後。

下面係關係A到入手，之前瘋摩一時的耀才散戶指數。

印證咗我最近觀察，散戶其實未追貨，大市會繼續上。

短期再獲利一注中海油(0883)

HSI 14連升，繼續減持中海油(0883)，繼續觀察1199同144。
中移動繼續扮移動。

追風惠理(0806)

前幾日先心思思想入，點知琴日黎個好消息一野對上20%，次次股災呢隻嘢梗炒上一次，買DD感受水溫先。

建倉少注中人壽(2628)

少有呢隻嘢成交入10大，今日排第7。
手痕建倉買少少中人壽(2628)@24.3
目標價25.1，短炒一個月。

增持中移動(0941)

最近個pool跟住恆指升創新高，就中移動(0941)繼續潛水，增持一注博追落後先。

Cash VS Stock
 35%   :   65%

獲利一注中海油(0883)

股市開市第一日HSI升成5百幾，策略減持一注中海油(0883)@11.5，股價越來越近我目標11.9。