顯示包含「財務策略」標籤的文章。顯示所有文章
顯示包含「財務策略」標籤的文章。顯示所有文章

2026年11月12日星期四

持有內銀的畏高症


最近有D【偽價值投資者】開心的煩惱!
話說小弟買賣內銀都有雙位數年資,
但都係第一次遇到買中大底,同時又揸到一個破歷史頂嘅機緣,
搞到成日思來想去都唔知點做?

內銀每年股息,大概占收息組合嘅 8%,唔算太多。
利申一下,貨底係23年最低位區間買入,
買入價計股息回報9%+  (扣埋稅),賬面平均又140%+ ,
如果出貨等於一口氣收成15年股息。
賣走轉美國國債,就賭內銀見頂部區間,好似無咩損失,收息計好似還有賺。

如果走貨,又覺得買唔返果口價 ( 無得打 J 低位持貨 ),
但唔走又怕第日跌咗呻笨 ( 世紀底都撈到,歷史頂唔走咁on鳩? ),
Zero 成本投資心法又完全無修煉過 ( E+練又唔夠內力怕走火入魔 ),
搞到 E+ 囉囉鑾。

嘗試尋找原因,但都理解唔到內銀點解可以升得咁誇張,
上網睇好多分析完全無一個可以令小弟信服,
或者係因為我未有緣分,未睇到高手貼。

唔知有無有緣分嘅【價投高手】、【江湖老手】路過,
睇到小弟呢篇野雞文,留低 2 句分享下、指點下?


23~26 -_-!

















2026年11月6日星期五

樓市無聊up:澳門第三季整體住宅樓價指數為183.3

明明澳門早2、3個月平均樓宇成交呎價升十幾%,有D呎價去返成萬一呎,衝上18年高峰,AA話貨尾單位供不應求搶都搶唔到,成個市場一片欣欣向榮。你班地產商會早2日居然公開呼籲政府出政策救市,居心叵測?亂澳之心人人得而誅之,當時好多“友人”都係咁睇。

但......今日

引用AAstock網頁資料:
澳門第三季整體住宅樓價指數為183.3

澳門統計暨普查局資料顯示,2026年第三季整體住宅樓價指數為183.3,較第二季下跌4.7%,現貨住宅(194.9)和住宅樓花(241.6)指數分別下跌4.9%及1.4%。現貨指數中,澳門半島(184.3)和路氹區(238.4)按季分別下跌5.6%及2.6%。按樓齡劃分,11至20年、20年以上的住宅樓價指數分別下跌0.7%及3.1%。

按單位實用面積統計,50平方米以下的樓價指數按季下跌2.2%,50至74.9平方米的亦下跌4.8%。與去年同季比較,整體住宅樓價指數下跌4.3%,澳門半島(180.4)與路氹區(195.2)的跌幅分別為4.4%及4.1%。

2026年9月22日星期二

呢個月無乜好up,就出個收息統計J下

2017-2026年,收息總數Top 10  - "累計"














平均每年多2~3個月人工,小小金庫,夠吃喝玩樂了。

呢幾年收息收收下都幾上癮,個人會懶唔想買賣。

2026年6月12日星期五

專注賭股

個市回撤,好多之前關注開嘅股票都接近一年低,
本身重注石油、地產板塊受到影響都唔少,
倉位都接近將今年盈利吐返曬出黎了。

最近思考咗好耐,係咪要向外擴張加多個重倉板塊分散風險,
結論決定:賭股
來緊會開始策略持續增持呢個板塊嘅股票,
銀河、永利係目標,希望假以時日可以成功。

2025年12月5日星期五

回答匿名朋友,澳門經屋淺見

Quoted:
“博主,想請教下本人單身中年,新城A區的經屋,因永遠姓經,是否是值得入手(不是投資),本人未持有任何物業,父母亦無物業比我繼承,因單身關係,正申請一房單位,因我看中的是可以住滿幾十年後可以原價賣回給政府(外間普遍認為是認為蝕,認為樓價必須大於入貨價,而且原價賣比政府蝕通脹)。
問題
經屋永遠姓經的條件下,現在經屋的售價是否不值得入手,應該兩房或三房才可考慮?或一二三房都不值得考慮,私人樓宇更可行?”
---------------------------------------------------------------------------------


呢到提幾樣嘢俾澳門朋友參考,然後根據呢個框架再引申討論澳門情況:
1.香港700萬人 VS 澳門6~70萬人左右,人口大約 [10:1] <---請記住呢個比例

2.澳門來緊5年計劃有3萬單位供應(連上面果13,000)、(報導係咁講)  VS 香港未來10年大約有30萬個“公屋”供應。

3.私樓未來香港3~4年大約有10萬個供應,澳門好似今年已經有5,000個已經批准樓花、批准興建等。

2025年10月9日星期四

價投恆生(0011)紀念po - 開心,不捨得地揮手說再見!


當年價投Blog 開始流行,有幸跟上潮流向一眾價投大佬學買收息股,
尤其對一位叫 Billy 嘅大佬(右邊有佢鏈接) 分享印象特別深,
有興趣嘅朋友可以去揾下呢位大佬嘅 “愛與恆生之交織” 網絡爽文。

佢啟蒙小弟對恆生(0011)嘅深入研究,然後膽粗粗收集咗,
今日2025年10月09日,匯豐(0005)宣佈 HKD155.- 私有化,
雖然少咗隻好嘅收息股,但成為回憶也不錯。

好耐未有機會一個月出2個Po,
借呢單刁出來打個飛機,為小弟呢個偽價投打氣。
直接上圖不解釋不多說,今晚晚餐加油雞叉燒先......哈哈哈

2025年10月3日星期五

成就獲得:股誌10週年任務達成

首先恭喜自己,居然堅持到寫blog 10年,
我 "柴淡風清標" 感歎 ~~ 人生有幾多個10年。


回想當年初出茅廬,
同好多新手一樣都會中冧粑降,
上網問完冧粑之後不假思索買入,
越買越大終於一次輸9成之後徹底清醒,
有幸損失只係 "十數萬港圓",
但當年對一個剛出黎社會工作嘅後生仔來講,
已經要儲好耐。


之後痛定思痛轉型,
先是當年香討見識到"啊suk"根德閣嘅威能爽文,
然後"數字人"一篇地產醒文令我獲益良多,
後來,什麼倖存者偏差等等觀點直接衝擊大腦,
網絡上暢所欲言令人樂不思蜀,獲益良多,
但隨著時代轉變許多事情已成過往。


十數年間嘅自身經歷,
加上慢慢地模仿他人成功之路,
最後到反思自己,
漸漸地自己發覺投資呢個遊戲,
原來自己喜歡贏率多過賠率,
一眾收息股慢慢成為核心,
積少成多聚沙成塔嘅威能漸見,
今天可以說已是略有小成,
在股息加持下,加埋份尚算爽皮嘅牛工,
生活過得尚算滋潤,比上不足比下有餘。


雖然唔係咩KOL、Blog界大佬,
希望下一個10年還有精力繼續更新,
偷換概念挪用一句醒己格言:士不可以不弘毅,任重而道遠。


今天,牛市嘅風又再吹起,
祝福睇到我呢篇廢文嘅大佬們,人人賺個8位數。

知命者,催吉避兇,保存實力,待時而起, 順求利 逆求存 ~~


2025年7月1日星期二

回老王兄,馬膠濠字2期的小見解

Quoted:

“想請教雲兄覺得濠字2期, 1900 尺, 咩價位岩數? 最近有個898 向海, 真係靚仔”

“另外時間點會否係新城A 落成之後一兩年? ”


多謝老王兄睇得起小弟,比個機會小弟就亂up吓最近對馬膠樓市看法!


首先澳門樓市升跌,要睇本地居民嘅風險偏好,當風險偏好擴張嘅時候,例如樓宇貸款上升,澳門樓自然會升;當風險偏好收縮嘅時候則自然下跌。

首先,如何判斷?

先看澳門整體存款數據如下:
根據澳門統計局數據,澳門澳門2025年第一季總存款數788,950M,比上季升3.5%左右,澳門呢幾年經濟無點增長,代表存量資金嘅選擇取向。再對比前幾年數據,明顯存入增速越來越快。

再看澳門居民物業按揭數據如下:
截至2025年4月底,未償還住宅按揭貸款總額2,143.9億元,與一年前比較減少5.3%;其中,居民部分佔96.7%,代表量縮。

然後看一般市民風險偏好選擇,例如是否考慮長期回報,定或者只看短期回報。
好明顯現在大家都係收縮狀態,前幾年D人買樓邊睇租金,只睇到下個月升幾多幾多。

我用Iphone舉例,以前每期Iphone新機出大把人出機,只要貴嘅不要對嘅。(呢D係擴張)
現在有新機出,D人會話,仲用得姐,等多2年先喇,講性價比。(呢D係收縮)
再例如旅行等等,最後都會傳遞到樓市上,當形成一個趨勢,就好難扭轉。
呢個係....................大環境。


其次,再看政府對樓市政策取向!

2025年5月18日星期日

由何解鐘情HK地產股說起

在多年投資嘅歷程中,小弟經常喜歡分享投資地產股嘅看法。

現在地產板塊明明受多方面夾擊,前景並不明朗,就算見底看似需要更多時間才能重返高峰,甚至都不知能不能夠重返高峰。


有人問何解?明明市場上大把回報高穩定高嘅股票選擇,例如電訊股、石油股。

其實理由很簡單,原因是多年來都看淡樓市,現在終於爆發了,但電訊、石油已經是上一個故事了。下面簡單講下:


當年係大陸,睇到塊田旁邊起棟40層出來比比皆是,盲嘅都聞到有濃味。

香港,一間新樓開放式都成千萬起標,就明有幾誇張。

澳門,唐樓都話400萬,但人工得萬幾。

大陸經過一波野蠻擴張後,以恆大落幕標誌結束了。

既然看淡樓市,身體力行一定唔會輕易入局持有“資產”,但萬一看淡睇錯呢,怎辦?為了對沖呢個選擇,買入HK本地地產股就係一個好方法。


地產股只鐘情HK地產股有幾個優勢:

香港是世界第二經濟體裡面,頂部嘅城市,所有國家重要城市,樓價定會跟隨其經濟成長的。

經歷過9703、08年仍然屹立不倒嘅發展商,是經過錘煉剩低嘅老江湖,防守力可見非一般。

香港係龍頭,信息透明,資本壟斷。

發展商係賣麵包,買家係買麵包,在壟斷情況下,造麵包贏面大。

股息回報歷年都比租金回報高不少。

本身就有折讓,而且折讓部分,正是資產嘅護城河,容易粗略計算、模糊正確,大概有個"廊"。

風險分散,一般人買樓係 "All in" 再加槓桿,實質係搏一口。但股票可以分開10隻8隻買,而且香港有足夠嘅好公司給與選擇。

反正行業一但出事,磚頭都肯定走唔甩,持有磚頭嘅必定溫水煮蛙後知後覺,轉身難,特別情感方面嘅制約,等等。現市況就說明一切了。

而股票轉身成本低,呢方面配合分散優勢有奇效,當然前提係地產股你要有愛、有信念、有堅持。


問? 何來的自信睇好地產股?


答:

2024年9月13日星期五

2024 預估收息成績表

一大籮公司公佈完業績,派息已經基本塵埃落定,除非好似早幾年匯豐咁on鳩除淨又唔派 >_<


嘉華(0173)一直係最重倉股,減派最傷,好彩三桶油加派息對沖返,其他不過不失影響唔大。今年有9個月有股息收,少嘅一百幾十地收,多嘅一萬幾千又係咁收,得咗~ ^_^

下年內銀改1月派中期息,正啊~,咁就得返2月、5月無息落袋,睇下有乜股票係呢 2 個月派息,買幾手,等可以個個月有錢落袋。


今年成績比上年好,同比多大約50%,但只因上年成績唔太好,基數低。選股雖然多,但板塊唔夠散,應對風險能力弱,以後慢慢出返D地產股加返其他。


分佈佔比大約:地產46%,石油35%,金融股13%,公用股6%。

預計今年股息:













2024年8月11日星期日

思維筆記 ~ 【澳門樓 馬交篇 2024】

馬膠樓市新風向,平行時空嘅猜測。


事由早幾日前,澳門金融管理局通知銀行,下年要銀行結束 [還息唔還本] 安排。

當看到呢個消息時,心裡五味雜陳。何解?要了解,首先講清楚幾個澳門樓市現存情況。



第一,無記錯早前先公佈澳門參與 [還息唔還本] 安排樓宇嘅業主數量約1萬1千個左右。

第二,澳門70萬人,無記錯2023官方數據公佈,住宅單位大約24萬左右,大約3人一戶。

第三,澳門政府房屋大約佔整體市場25%,代表私人市場流通嘅有75%,亦即18萬左右。

第四,澳門近年上車嘅年輕人裡面,大部份人都有加按父母層樓,作為首期和裝修。


推理如下:

澳門政府樓相對便宜,照估 [還息唔還本] 呢批人,基本係屬於私人市場裡面嘅業主,亦即約6%。

澳門供滿樓業主有幾多?揾唔到數據,但可以由政府公佈數據大約推算(截至2024年6月底,未償還住宅按揭貸款總額為2,246.7億元)。

👇👇👇

2024年4月14日星期日

澳門樓市 入場思考

2024 澳門辣招撤回,何處轉角,是否入市良機?樓市升跌總有原因,但眾多原因中肯定有主軸。下面推演幾個因素,思考下!


1.美帝有資產定價權,港澳利率必然跟隨其後,長時間貼近,未有40歲嘅人未體會到好正常,但呢班人正是澳門樓市主要買家。

2.資產泡沫,現在是去泡沫期,租金對比未接近HK之前,爆破未完。

3.本地購買力斷崖,打擊賭廳之後澳門少咗班中產,新工作機會就算連銀行等大企業,都開始向勞工傾斜。本地人消費力減低,僱主因利潤受壓,繼續傾向僱傭勞工,澳車澳腳北上消費,外勞走資走水,融入大灣區,進入單循環。

4.香港減辣,呢個級數嘅聰明錢,肯定唔會困在澳門,又分咗澳門一杯羹,珠海坦洲續跌,又咬走澳門一邊。澳門樓宇質素普片低下,跌市成為放大焦點,買入風險高,跟住減又唔夠人爭。

5.澳門政府成為樓市最大發展商,但佢並不需要賣樓賺錢,只需要面對政治任務,劈得勁過長實Blue Coast 濕濕碎。唔明去松山望去明珠都匯,高過御景灣,賣幾錢?

6.算,唔講了,鐘意再補充。

7.坊間智慧,千萬不要同李嘉誠對賭,香港姐?澳門邊關事,又好似係,up多咗一句,咁當無講過。


利息高,通脹高,只要你人工高,都可以頂起樓價。問題係,澳門現在基本全部掉轉。

投資,自用,成本高企 3殺,係要我講結論?

“澳門樓穩中向好長期趨勢不變”,現在係健康調節。


大家唔好灰心,必須堅定信念,繼續在港股爆破中等待美帝上多2層樓跳樓死,到時候一天都光曬。(我肯定同緊上帝飲下午茶,仲唔光咩...hahaha)。

香港97 跌咗十鳩幾年先返到身,仲要靠美帝08爆煲印銀紙減息先得,入場嘅要做足心理準備。


玩笑講完了,有無計?如果你還相信資產可以返轉頭,可以考慮下香港一堆落爛Reits,買樓有槓桿買股票無,不過股票有折讓,都可以當槓桿,計落除笨有精。

放張2778嘅圖拋轉引肉,智者見智了。真係打算供樓嘅人,真心考慮下有無其他嘢供可以代替。香港樓市經驗,樓升唔會死人,樓跌大把人跳樓。


2023年11月28日星期二

思維筆記 ~ 【澳門樓 馬交篇 2023】

        2023澳門開關,經濟不似預期,物業規則政府重新劃線,記錄下比自己以後鞭尸~

        最近身邊都不少人討論樓呢個話題,本人都有重新檢視過往睇法!就最近政府劃一將樓宇按揭上限劃線7成,分析如下:


        以前330萬借9成嘅、800萬借8成嘅,新例生效前有支持,唔使劈到成身血都有機會走,而最近身邊案例已經證實!買家好明顯係之前有首期,但選擇觀望嘅購買力。

        800萬以上嘅唔使講,未有運行住,因為仲要一半首期。 明年新例生效,好明顯對現在800萬以下嘅樓來講,係加辣,800萬以上嘅係減辣。邏輯上現在800萬以上嘅要升。

        不過,明年第二條新規係壓測 +2%,呢樣肯定對所有物業都係負面影響,等於加辣。呢個gap,對樓價嘅影響,一係買家每月加錢去馬,一係業主讓利。往往買樓嘅都係盡去,但現在澳門經濟環境,買家有心無力!所以推測方向應該業主讓利,即樓跌!


        平價樓好似唐樓之類,由1成首期變3成,唔會全部由業主嘔,亦唔會由買家追曬差價,中間差咗2成,當買家或者業主各讓1/3,最後1/3睇下年個勢係邊便,逆勢果邊讓利。照咁推演,唐樓之類大概跌多一成左右就係底!

        其次係購買力下移,上車盤最麻煩係首期,部分買家對應樓嘅層級會向下移,對最平嘅樓反而有支持。

        現在500萬到700萬嘅,對應魚群會少得比較明顯。原因係呢班人本來首期唔夠上800萬果級,收入夠手長掂到!但下年首期多咗,壓力測試一加,呢班人受2面夾擊最明顯!

        原本買得起800萬以上嘅呢班人唔會有咩影響,反而有機會撞到高質貨,往往高質嘅嘢,係見底反彈5%左右會湧出黎!

        假如現在定位300萬~700萬下年要跌,現在800萬以上嘅,雖然話下年放寬按揭比率2成,但一環扣一環,換樓嘅自己層賣平咗,上面嘅好難無得唔跟落,呢樣應該比較容易理解!


        上述都係本地因素其中一部分,第二部分係銀行對資產定價嘅睇法!呢樣嘢又受到港元息率影響,港元受美元影響,亦即係要睇美國!全世界資產定價嘅錨,基本睇美國國債息率。若果銀行下年加固對美國維持高息率嘅看法,樓都應該睇負面少少比較好~

        另外,本地人工作機會,薪資增長,又受勞工影響頗深。若果勞工無退場機制,政府唔盡力保障本地人,我睇呢次都幾難翻身。勞工賺錢係走,唔會留係澳門。澳門本地人收入少咗,消費北移,本地小商鋪收皮,形成惡性循環!老老實實,澳門唔係好多間“馬慶康”。

        澳門本地樓市,始終主力係本地居民!而且澳門樓遠未到黑暗期,首先未係真正意義上負資產,好多後生買樓嘅首期係上一代樓升嘅利潤,呢個係存量資金。因為呢種同父輩嘅捆綁關係,澳門樓仍然係在消耗階段。

        

        政府現在係盡量拖長佢,等轉機。澳門樓幾時係機會?

        1. 或者類似4釐補貼嘅政策再現。

        2. 公務員可以動用公積金買樓、供樓。3萬5千公務員,有15%出黎買都5K購買力。

        3. 政府樓供過於求,無人買。(已經出現)

        4. 本地發展商都唔睇好後市,突然大堆丟貨,過多2年就差唔多時間係底。(已經出現)

        唔好比減辣帶節奏,買家應該要嘅係“加甜”!澳門政府唔係無錢,D錢流咗去咗邊?自己諗。而賺錢果班去邊自己睇喇,你夠膽企佢地對面你咪企囉......


        廢話講咗一大堆,都不及今日朋友講咗句:

        “見撚到澳門堆舊樓都驚,再用幾十年去供,仲撚驚~”



        

2023年11月14日星期二

思維筆記 ~ 【港、澳樓編】


用來提醒自己嘅筆錄,亦是近十幾年形成我對樓市思維觀點、投資股票方向的奠基石。


【樓編】

我對樓市的分析, 從來是從投資角度來看的。 現階段的樓市,投資價值欠奉,投機價值全無。 在政府設置了一系列高交易成本障礙後,只剩下用家市場, 使用價值被無限放大。 在過去十年美國量化寬鬆幣策影響下,樓市又形成了一個新的定形,只升不跌,並深深地印記在香港人的腦海中。

資產價格之形成,主要由三大因素決定:利率、風險以及交易成本。三大因素交滙之點,就決定咗資產價格。政治環境、司法制度,屬於風險範疇,亦牽涉部分交易成本。

所以香港資產價格點解向來比大部份地區高水,係基於一國兩制。如果一國兩制有問題,資產價格要重新定價。
 
睇市一定要由多方面看,做生意嘅,炒賣嘅,最後先看用家


樓泡沫:
Over build、Over leverage、Over price

香港樓有無泡沫:
金融因素,息率歷史低位,需求因素,斷層供應令租金有支持,租金就係樓價支持嘅腰。


為何唔買澳門樓?

政府行為,凡政府行為必定根據數據然後採取措施,樓在牛市的時候是收緊,熊市就放鬆,好明顯澳門2018年2月放寬首置成數到8成喺信號,往後雖然升貼800萬,可惜大價樓仍然有價無市。
一般人除咗買之外,無其他方法,而我發現有其他方法用好少代價就住到。而投資呢?係股市上對沖到嘅股票有一堆。

回報率亦都係一個好重要考慮,定期俾到2.8%,香港收租有2.7%,澳門收租得1.8%,簡單講香港用600萬做到嘅嘢澳門要用900萬。

好多人都無理過,供30年樓,利息上到2.25% ,就係同本金各一半嘅位置。遲早領嘢~

2023年6月10日星期六

平凡人的投資道路,必須早買樓?

最近有Blogger講細果陣老師講人有好多機會,機會到陣最緊要有鏟,然後要分係唔係陷阱。突然諗起有句說話講:"貧窮可以世襲"。人大咗,覺得呢句說話真係一般人命運嘅緊箍咒。

早前有個"少年得志"嘅公務員年青人同我閒談,講咗一輪自己點努力,年紀輕輕就買咗間小蝸居,平日有時間就揸車同條女兜風(順便xx),捨意人生。不過講講下就抱怨好辛苦,歎氣點解"辛苦咗咁耐",好似乜都無改變,仍然生活這麼難,問如何可以更富有?

一般人,如果無家庭支援,係呢個資本社會裡面,想改變命運,首先就係要節儉。只有節儉,你先有機會儲到自己第一桶金,亦即資本。然後你需要幾個機會,係投資市場上面翻滾下,將桶金好似雪球咁滾大佢,然後就可以“開始”改變命運。(讀多D書當然都好大機會都得,不過唔係呢到探討)

但呢個過程絕非一帆風順,首先有幾個年輕人必然遇到嘅"時代陷阱",隨時出現係所有一般人面前,我列舉幾點:

第一,打卡文化(包括:換電話,去旅行,同條女慶祝,買呢樣果樣潮玩......),其實就係追求錦衣玉食。

2022年11月3日星期四

100萬 股票教育基金倉

打風無嘢做,諗起最近同朋友討論過,幫小朋友整個教育股票基金買乜好。

要求:
1. 股價無需要預期大升,最好對上5年股息穩定
2. 考慮匯兌風險,最好港股、大陸股各佔一半
3. 分開5個板塊以上
4. 本金100萬,目標每年收息10萬
5. 流動性不需太在意

E+股災緊,都係機會部署下長線,既然咁多股票都咁殘,都叫大把嘢揀,唔似上年,好多嘢都無從入手。參考blogger今年post過嘅嘢,求其出個版本參考下先,呢幾日得閒睇下可唔可以優化下。




























不過老實講,我個人喜歡集中3幾隻算,太多睇落去都眼花。比我就941、3988、883加几隻香港Reits或者地產股算,或者仲好!

2022年2月3日星期四

閒錢的選擇,股票與樓 - 思路淺見

新年遊走拜年,閒談中得一個花生故事,即本幻想下先。

話說某Uncle嘅仔仔年青有為,有份穩定嘅工作月入大概35K (未計雙糧花紅),係澳門生活暫無憂慮,有HKID,港澳並無物業......仔仔人到中青現有閒錢4M想安穩地投資增值,Uncle亦有4M股票收息過日子,有何選擇。

首先作出幾個假定先:
1. Uncle可以借4M股票俾佢個仔開8M銀行A/C。
2. 股票假定買新鴻基(0016)。
3. 香港買樓借到5成,海外收入夠過壓測。
4. 出租回報率已經扣減必要雜項支出。
5. 只考慮樓或股票作為投資工具。

根據佢仔仔情況,大概總結出3個可行選擇作出比較:









簡單諗咗諗,考慮到現在情況,好似股仔直博D。


2021年12月29日星期三

2021年度記錄

“2021完,感激港股給我精彩嘅一年。”

回憶**2020年結 & 收爐數據記錄:

先講虛嘅,2021年股票賬面仲輸緊:-4.66% (截至29/Dec)

再講實嘅:
股息:增長123.14%  (收息歷史高)
交易:上年負,今年扭虧為盈  (盈利歷史高)
盈利:增長885.49%  (上年交易輸,靠股息勉強拉返正數,基數超級低~數據老千Feel ^_^ )

今年喺虎頭蛇尾嘅一年,開局順風順水,單單長實(1113)就貢獻今年成半盈利,大股東回購派糖套利兼收財息,其餘股息主要靠中石油(0857)加派,聯通(0762)、中海油(0883)都有唔錯貢獻,聯通亦首派中期息。可惜持倉股仍在一個輸錢嘅位置。

交易方面,今年 "虧選" 就喺隻垃圾中人壽(2628),埋數輸我6位數,痛到慘叫 “丫咩爹” 。賺錢嘅就有15隻:長實、中石油、中海外、聯通、工商、中海油、交通銀行、越服、微盟、萬州、MGM、騰訊、越房、越地、恆大地產。

手上仍持貨9隻,除長實、中海油賬面正數,其他全部虧損ing~:(中石油、金沙、聯通、美高梅、粵海投資、嘉華、萬州)。

現在諗下年諗乜?
石油價格啊爺控唔到,不過油股佢控到,老實講控到咁殘都唔知為乜。港股疫情咁耐,幾隻地產雖然殘不過點都死唔去,香港喺咪真喺咁靠啊爺要反思下,不過賭股就好明顯喇,唔使多講。電訊股殘到現價買收息一流,感覺揸佢好過揸內銀。中概科技股雖然大家嗷嗷聲,觀察身邊股友又唔覺得佢地輸大錢,估計下年都喺上落格,會考慮搏少少。雖然每個版塊持股目的唔同,希望幾隻重倉可以一齊跑出,哈哈......諗下都覺得實在太貪心。

另:澳門樓,租住真心正,只租不買王道也。


2020年12月31日星期四

年結 2020

2020話咁快又玩完,今年仍然無咩起色,繼續順住2019嘅態勢掙扎緊( 2019年結 )。

股息收入按年升 +15.51% 創新高,年頭匯豐(0005)換馬長實(1113),呢部分嘅股息相差唔太多,好彩換咗,假若仲揸住大象嘅話屎都無得食,何解大家都知無畏廢話。而增長點喺隻垃圾中石油(0857),年頭溝咗注加上今年無la la加咗中期派息。

買賣方面就俾隻大象(0005)累全家輸到爆廠,最後慢磨靠長實(1113)、聯通(0762)、領展(0823)、新鴻基(0016)、工商(1398)、太古地產(1972)、嘉華(0173)同隻置富 (0778)追返大半,出咗貨嘅部分埋數計 -63,115 慘慘豬。


**值得安慰嘅,( 股息 - 投資買賣損失 = 有小小賺) 雖然少得可憐,哈哈哈~又賺咗經驗。


組合得返5隻,按年尾最後一個交易日價值排,首位長實(1113),然後中石油(0857),工行(1398)同交行(3328),最後中海外(0688)少少倉位搞下笑。2019年結時股票組合賬面 -12.50%,今年承接上年條數再輸多約 -3% 去到 -15.42%。

中石油無乜好講,純粹幾年前艇貨。重錘長實係幻想呢次疫情之後,香港可以回復生機,所以押注落去地產板塊,本黎打算賭股都押,不過跌得唔多,算數了。

呢次最慘係股票跌樓唔跌,準備咗咁多年終於等到大劑嘢,點知遊戲玩法變咗,澳門樓跌少少,香港樓乜無點跌。無計唯有重新出發,雖然樓無機會,不過股票仍然機會處處,可惜錢太少~

今年香港政府按揭政策改咗,根據澳門經驗,現在600萬左右嘅2房,仲會繼續升,欠缺嘅係一個理由,幾年後隨時900萬+。(姐喺睇好)

無無聊聊記錄咗5年blog,下年繼續鳩up ~~


2019年12月21日星期六

年結 2019

話咁快又一年,睇返( 2018年結 )就一殼眼淚,今年嘅表現喺繼2015年之後最差嘅一年,應咗2018年年結第一句,無咁幸運了。

今年全靠股息頂住,股息收入比上年增加 6.9%,占整體收入 83.8%。炒賣股票收入今年全靠長實(1113)頂住,輸得最多係長和(0001)同莎莎(0178),最後叫賺少少叫唔使輸住走,占盈利 2.3%,另外嘅13.9%係定期收入。

埋數"落袋計",慘慘豬比上年少咗成半有多,只係上年條數嘅45%,下年要節衣縮食喇。賬面仲要輸緊,今日計大概係個Pool買入價值嘅 (-12.5%),下年睇下有無機返家鄉。

目前股票占資產組合 76%,第一持股係大象(0005),第二係垃圾中石油(0857),然後就沒有然後了

澳門樓市下年睇好3M以下可以借9成30年左右嘅唐樓仔,香港睇好東涌藍天2房 or 1房。

今年其實個人好懶,希望下年可以有少許改變。