2019年1月9日星期三

繼續走貨 長實(1113)

有人辭官歸故里,有人連夜趕科場!續走長實(1113)而且大注走,走剩一手,做觀察貨底攞感覺,擇日再戰。

2019年1月8日星期二

建倉中銀香港(2388) + 策略賣出 長實(1113)

長實(1113)呢幾日識得飛,趁勢賣出2口最貴嘅持貨,市亂增加D現金同加強下股票嘅偽護城河。少許獲利夠食個下午茶,還有4注睇位等食糊。Lee+X大大係年初2號@52.4x同3號@55.8x增持300萬股左右,賬面已經獲利千萬,好勁。

呢排掛住打機都唔記得做記錄,早日跟大神朋友@HKD29.20買入一手中銀香港(2388)建觀察倉。現價HKD28.50坐艇中。手頭持有股票增加到6隻。

2019年1月4日星期五

2019年第一槍 增持 長和(0001)

昨日增持長和(0001)一手,同澳門警察捉食煙開槍一樣,雖然對個倉無乜作用,但都叫新年第一槍。最近大市成交唔多旺,加埋中美貿易戰影響,睇下有無機會撈返少少擺下先。

石油近月大家有眼睇跌到喊曬口,執筆時中石油(0857)現價HKD4.90已經低過我個石油倉最低果注,由於倉位比較大同控制倉位比例,溝黎都無乜意思,繼續持有等佢上返去算。

長實(1113)最近俾長和表現好,可惜只喺第四倉順位。

策略方面,繼續擇優持有,遲D好價應該會連滬深300(3188)都斬埋。


繼續打Switch 嘅Diablo III 同自己得閒J下呢個斯托克代爾悖論(The Stockdale Paradox),希望呢個難關快D過。

2018年12月17日星期一

年結 2018

話咁快又一年,睇返上年記錄嘅股市足跡( 2017總結 )感觸良多,往年大市順豐順水,今年被動挨打,慶幸根基打得穩今年力保不失,不過明年就難有咁幸運嚕。

今年股票埋數"落袋計",連埋股息同比增加 54.1%,其中股息占總收入 35.9%,而股息對比上年增加 13.2%,買賣VS收息大概都喺維持6:4左右,雖然今年市道唔太好,但今年成績表反而喺歷年表現中最好嘅一年,多得中海油(0883)今年嘅神勇表現。現手上仍然持有匯豐(0005)、中石油(0857)、長實(1113)、長和(0001)、滬深300(3188)呢5隻悶股,希望能夠挨過中美貿易戰呢場大龍鳳。

股票呢樣嘢,無信念真喺好難贏,升揸唔穩,跌揸唔住。經歷2017同2018大上大落之後,我發覺寫諗法好重要,但偏偏份人好懶,希望下年可改之。

澳門樓市方面,仍然維持2017觀點,睇2019有無機會執平嘢,部分首期已經擺落銀行定期候命,今年銀行存款開始有可觀嘅利息,同前幾年比簡直可以話係差天共地,本地2間大嘢都出Plan半年2.88%~2.89%,對比買樓收租呢樣嘢,如果樓唔升就已經無意思了,或者我覺得打理太麻煩唔值罷了。而且對比三個月前,已經明顯向下調整10%,但只喺返年頭水平附近,睇黎我又可以繼續喺班Tea友到繼續"牙插插"。


知命者,催吉避兇,保存實力,待時而起,順求利、逆求存。

2018年12月11日星期二

增持 長和(0001)

英國不確定性睇埋呢個禮拜大戶有乜解讀。價錢吸引,新低位增持一注。

呢個月短短10日,個Pool跌到新低,準備年結。

2018年12月3日星期一

清倉 MGM(2282)

中美暫時延遲開火日,HSI今日收市都升成675點。今年好多基金都輸到趴曬喺到,年尾因為中美戰事暫時休息,基金粉下個窗都勇D,估計基金起碼過埋今年呢幾日,下年再各自修行。年尾睇好,短炒可以博下追追貨。

今日趁MGM(2282)升成13%出埋貨尾無眼睇,最後呢注賬面唔計手續費虧HKD1,000。年尾我都要整返靚個Pool。手上得返5隻股票陪我過聖誕。

2018年11月23日星期五

止賺一注 MGM(2282)

上個月入咗少少MGM(2282),止賺收返少少Cash幫補下午茶錢。

今日港股成交595億,加埋朋友說今年俾大C串到無聲出嘅英Sir用佢Run隻基金3%買咗12月Call,搞到我對後市睇法有保留。

匯豐今年最後一次收息已經袋袋平安,同時手上持貨可以收息嘅都收曬嚕,用上年度收息粗略計同比增加13.2%。匯豐(0005)繼續係收息龍頭貢獻其中39.6%,然後喺已經沽清嘅中海油(0883)占21.7%,呢2隻已經占6成。下年收息除咗大象外,加入長和(0001)同長建(1113),期待表現。

2018年11月5日星期一

沽清 嘉華(0173)

上禮拜5,恒指爆上1,070點,D乜10年啊N年啊嘅記錄出曬黎,的確我印象中升成千點已經係08年果陣嘅事,耐到好似喺銅鑼灣希慎廣場地盤天秤跌咗落黎嘅果陣嘅嘢,當年仲係公司望住同D同事嘰嘰喳喳。

早2個禮拜買咗少少嘉華(0173),其中一注好彩撈到底,今日食胡執少少跌市安慰獎走。

2018年11月2日星期五

增持 中石油(0857)

呢幾日股市過山車,10月跌2千幾點呢三日升返一半,尋日中石油出業績報告,兼中期息收息日,加上見個股票倉去返綠色,時隔10個月,再出手買入中石油(0857)。

匯豐(0005)同長實(1113)近呢個禮拜跌到好得人驚完全唔敢撈,點知就噤就上返曬。長和(0001)就無眼睇喇,跌就跌凸升就瀨屎。MGM(2282)今日跟住賭股爆升10%+,好彩上禮拜買咗注叫有得開心下。滬深300(3188)睇黎大陸出政策見短底25xx,開始有D力,連平保(2318)都擺埋出黎話回購最多10%,但小心啊爺喺齋up唔出錢。嘉華(0173)有注買到個底,賬面微利算喺股災中一點安慰。

最近仲follow咗網絡紅人Dr.Ng,睇民眾財經覺得佢講嘢有氣場,最強淡友非佢莫屬,大師睇黎要小心位置被取代。

另外C永清都出文話希望樓市唔好跌超過3成,自己聽落覺得弦外有音,供過5厘息以上嘅人都基本係40+,後生一代現在喺有實力,但最怕係息魔喺你唔掂果陣踩一腳,呢個世界喺.......越窮越見鬼。

2018年10月30日星期二

增持 MGM(2282)一注

MGM(2282)今日又破底,昨日增持了一注博佢唔破底,點知一買即蟹。

嘉華(0173)大股東上禮拜有動作回購,暫時2注都略有小盈,大跌市下估計都唔升得去邊,目標HKD3.8到咗考慮走貨,好耐未發過市,等呢塊小肥肉養多陣先。

匯豐昨日大升5%,印象中好似好耐之前喺無線新聞到見過呢個數據,不過已經唔知幾多N年前。公佈業績數據比大行預期好DD,居然可以升成咁,我覺得E+個市錢還在,問題在於個個都唔知追乜好。反彈拐點未見,但好消息D股票都肯彈下,最惡劣情況未到。

2018年10月25日星期四

增持 匯豐(0005) + 長實(1113)

啊爺早2日唱好升返日,大戶沽返2日破埋2萬5,繼續增持匯豐(0005) + 長實(1113)。

個股票倉賬面計,月頭仲有成8%綠色利潤自J,今日開始見紅.......

2018年10月19日星期五

增持 匯豐(0005) + 嘉華(0173)

個市跌到無底一樣,如果乜都唔做,萬一觸底就會得個吉,所以又唔可以咩都唔做,為咗應對最壞情況,已經唔可以好似之前咁1蚊增持一注,唯有改變策略跌2蚊增持一注,收市前策略增持一注匯豐(0005)。友人問點解唔買盈富基金(2800)係要堅持匯豐?其實好簡單,以前買過盈富同港交所(0388),雖然知道佢喺好嘢而且買得算平,但就喺唔知點解揸唔住,反而大象派派下息就揸住咗,一季收次息嘅感覺的確幾爽,心魔嘅嘢實在好難解釋。

嘉華(0173)市值跌穿100億,個人認為股價已經進入甜區,暫定每跌7%策略增持一注。

2018年10月18日星期四

蔡楓華 - 投資路上的靈魂共鳴

蔡楓華(Link),有返咁上下年紀嘅應該會熟悉佢,唔熟嘅都可以Google下,一首" 絕對空虛 "加上一句" 一時嘅光輝,未必喺永恆嘅 ",成為年代經典。

寒冬已至,價投路上," 絕對空虛 "(Link)特別有共鳴,或者正正好似坊間所講,呢條始終喺小眾嘅道路,得閒J下呢首歌希望可以鞭撻到自己。

" 一時嘅光輝,未必喺永恆嘅 "(先唔好理咩曼德拉效應),經歷幾次股災大難不死,今年股災反而沐浴春風曉飛一樣,得閒J下呢句希望可以警惕到自己。

感謝蔡楓華!!喺荃灣給我靈魂震蕩的一晚~

2018年10月12日星期五

建倉 嘉華(0173) 策略增持長和(0001)

琴日股災跌千點,今日回返你500,當我喺黑E咩.....

建倉買入嘉華(0173)一注,呢隻股年頭曾經考慮過買入,當時目標喺HKD4.05就建倉,可惜跟住爆上唔成事,今日收市前喺HKD3.38買入算喺完咗個情意結。雖然喺香港唔算特大發展商,但喺今年出手入標幾塊地都夠"Long Say"(狼4),我中意。

長和(0001)已經跌到上次一路買入嘅最低注位,習慣上呢嗰位開始,第二輪策略增持開始。

2018年10月11日星期四

沽清 惠理(0806) 加注長實(1113) + 滬深300(3188)

股災跌成千點好耐未試過,趁勢落決心沽清組合第一重虧股惠理(0806),策略加注長實(1113) + 滬深300(3188),繼續增加現金同換貨。

幾次股災經歷,唔想左完一巴食埋右一巴,一定要換返D貨唔好揸曬錢。

2018年10月10日星期三

沽清 中海油(0883) 買入 長實(1113)一手

中秋同國慶之後,啊爺話15號降準1%都頂唔起個市,個市喺呢個位,有D錢真喺唔到我呢D散戶賺。

既然壞消息咁多個市都喺跌得咁少,買一手長實(1113)溝溝佢跟大公子種下樹先。澳門國慶數據叫有增長,但賭股繼續無運行,MGM(2282)又覺得未見底,睇定D增強下信心遲少少再考慮。

中海油(0883)趁今日反彈,沽埋最后一注貨尾費事成日心掛掛。短炒有時真喺做多賺少,合埋眼掉喺到反而喺好事情,今年大豐收全靠呢隻單天寶至尊。手上仲有中石油(0857)同匯豐(0005)呢2隻主力喺到猥瑣發育,北水近日都有密密收,希望下年有運行。

回想當日重注中海油,一樣喺個市壞消息滿天飛,到價買入後一定要有信心坐貨,唔好俾所謂嘅年回報率呢種心態框住,警惕以年為單位嘅短炒行為。

下面喺今年中海油嘅心路歷程數據記錄:

2018年10月3日星期三

走貨 長建(1038) + 平安好醫生(1833)

今年5月開始買入長建(1038)總共買得4注,收過2次息夠食幾次下午茶,長建喺好股票防守能力好強,但呢個時勢唔知點解好難敢落重注去大注買,眼不見為乾淨一次放曬,現金留返俾長實(1113)算,這或者喺我鐘意有大老闆回購嘅股票較多。

之前貪得意走去抽咗手平安好醫生(1833),輸幾百順手放埋無眼睇。

匯豐(0005)又準備除凈,加埋11月收埋中海油(0883)同中石油(0857)嘅股息,估計今年全年比上年多收12%息,今年中海油出得7788,為下年收息稍後要部署返D收息股先得。

2018年9月28日星期五

止賺一注 中海油(0883)

中海油(0883)今日食屎咁上,原本按【風清散貨心訣】打算HKD15.00放嘅,訓醒開apps睇果陣已經上到HKD15.50咁無理由唔放噶,下注喺最後一注,目標HKD16.00。

長實(1113)今日跌一跌,睇o下下禮拜有無機會入返D先。

香港銀行加息,雖然用開間喺加0.125%,不過活期已經喺多咗125倍,好感動終於唔使收息收幾蚊喇。定期1個月1.00%,3個月有1.75%,6個月有2.00%,今日做咗1,3,6個月嘅定期,綁定D資金費事手痕亂用。

2018年9月25日星期二

繼續增持 匯豐(0005)

成日吹加P,不過未加P 銀行就加定期利率,今年我都做咗張半年定期@2.1%,對上果次做定期都已經係9年前嘅事喇,呢幾年簡直係揸Cash嘅噩夢,一球擺銀行活期得10蚊嘅日子要過去了。

細嘅財務公司好似Aeon(0900)一講加息都好正面股價GoGoGo,大銀行就玩反高潮,又或者係之前升得太快?繼續買上,昨日增持匯豐(0005)一注,睇班大戶點演繹加P。

2018年9月21日星期五

澳門 買樓租樓 反思

近期友人因小朋友問題考慮置業,得幸有機會貼市一次,重新思索樓作為投資或自用嘅問題。


首先,澳門樓市玩法喺MOP800萬樓下嘅樓,可以做80%按揭( 上年按揭玩法喺MOP600萬樓下做70%,MOP600萬 - MOP800萬做60% ),MOP800萬以上則只做50%按揭,其他同香港相若。此政策下澳門樓價今年無視賭場股調整繼續升唔少,大家都心慌慌怕第日買唔到樓。