年結 2020

2020話咁快又玩完，今年仍然無咩起色，繼續順住2019嘅態勢掙扎緊( 2019年結 )。

股息收入按年升 +15.51% 創新高，年頭匯豐(0005)換馬長實(1113)，呢部分嘅股息相差唔太多，好彩換咗，假若仲揸住大象嘅話屎都無得食，何解大家都知無畏廢話。而增長點喺隻垃圾中石油(0857)，年頭溝咗注加上今年無la la加咗中期派息。

買賣方面就俾隻大象(0005)累全家輸到爆廠，最後慢磨靠長實(1113)、聯通(0762)、領展(0823)、新鴻基(0016)、工商(1398)、太古地產(1972)、嘉華(0173)同隻置富 (0778)追返大半，出咗貨嘅部分埋數計 -63,115 慘慘豬。

**值得安慰嘅，( 股息 - 投資買賣損失 = 有小小賺) 雖然少得可憐，哈哈哈~又賺咗經驗。

組合得返5隻，按年尾最後一個交易日價值排，首位長實(1113)，然後中石油(0857)，工行(1398)同交行(3328)，最後中海外(0688)少少倉位搞下笑。2019年結時股票組合賬面 -12.50%，今年承接上年條數再輸多約 -3% 去到 -15.42%。

中石油無乜好講，純粹幾年前艇貨。重錘長實係幻想呢次疫情之後，香港可以回復生機，所以押注落去地產板塊，本黎打算賭股都押，不過跌得唔多，算數了。

呢次最慘係股票跌樓唔跌，準備咗咁多年終於等到大劑嘢，點知遊戲玩法變咗，澳門樓跌少少，香港樓乜無點跌。無計唯有重新出發，雖然樓無機會，不過股票仍然機會處處，可惜錢太少~

今年香港政府按揭政策改咗，根據澳門經驗，現在600萬左右嘅2房，仲會繼續升，欠缺嘅係一個理由，幾年後隨時900萬+。(姐喺睇好)

無無聊聊記錄咗5年blog，下年繼續鳩up ~~

4 年後 再次建倉 中海外(0688)

對上果次買入中海外(0688)係2016年尾，記錄顯示當年買入價位係22.x，然後係2017年3月(@25.x) & 7月(@26.x) 賣出各50%，持貨大半年成功全身而退。

時隔4年，今日係股友M加持第三注之際，跟風買入(@16.5)少少試下水溫，揸佢半年再算。

增持 長實(1113)

尋日睇新聞話黃竹坑第五期長實(1113)有入標，見又穿返40樓下，買少少坐坐貨。

今年嘅長實~ 見血浮生

沽清 置富(0778)

呢幾日舊嘢升到bomb bomb聲，呢隻雞肋股置富(0778)，趁揸咗貨未夠3個月，賺少少夠食個下午茶離場算。

主菜長實(1113)呢個星期好威猛，有注係36.5撈到底，升咗10%+。不過隻垃圾中石油(0857)尋日升少中海油(0883)成半有多，無眼睇佢，返到3蚊樓上先再算。

身邊股友仔上禮拜仲係到新經濟股無限列車篇，又吹又捧又話全集中呼吸去買，呢個禮拜到位全部縮得個睇，風水輪流轉，股海定律。

增持 工商(1398)

 個市咁升法，內銀都叫有少少反應，唯獨工商(1398)無乜反應，我就買返少少加持下睇下係咪咁"非洲"命。

過多個星期收中石油(0857)股息，你老闆有時候真係唔怪得人唔中意啊爺。

長實(1113)仲係咁7霉，新鴻基(0016)都上返唔少，就你隻仆街唔7升，心都淡鳩曬。

繼續增持 長實(1113)

長實(1113)今年咁多注入面，最平果注34，最貴49。

今日見朋友入咗少少，膽粗粗都跟入返DD，原黎40樓下幾乎無貨，呢Round貨最高位去到51。

撈底唔識放，摸頂無膽走，比我呢個散戶應驗曬。

真係富貴有如浮雲，但你老闆浮雲係我命根呢~

增持 長實(1113)

 呢2日有D feel，策略增持少少長實(1113)短炒下。

建倉 置富(0778)

尋日內銀派成績表之後大戶話要跌，可憐我上星期搏一搏變搏艇，睇黎要坐一排。本黎想溝內銀，不過諗諗下，個人猶豫都係唔好溝住，等等再算。

唯有買D其他類型嘅股票壓制下心魔。揀揀下，揀隻之前某blogger大神講過嘅置富(0778)，一直想買呢類型嘅股票今日終於落手了。


朋友金句："做好輸錢覺悟嘅人，先有資格贏錢！"

建倉 交通銀行(3328)

星期五業績前買入少少交通銀行(3328)，搏業績無預期差，業績係比預期好，但點知業績後話檢討派息政策，睇黎今次仆街鳥。匯豐衰咗估唔到到佢有股份嘅公司衰埋。

走貨 嘉華(0173)

打風前無喇喇買咗，打完個風升咗10%，呢D機會無理由唔出貨嘅，係戰績上添筆 JJ 記錄等第日有得吹都唔錯。

趁星期五最後一日，出清嘉華(0173)執 2K+ ，夠食一個月一哥豬扒飯。E....難道要買大家樂？

沽清 太古地產(1972)

沽清太古地產(1972)，搵第二隻玩具。

建倉 - 嘉華國際(0173)

18年尾係呢隻嘉華(0173)到賺過少少，走咗聯通(0762)同太古地產(1972)之後有點念舊心態，加上有返少少cash手又開始痕。

睇返記錄E+口價同當年買陣差唔多，仲記得好似當時大老闆個女有系呢個位增持。銀河(0027)琴日升到上60蚊，話曬佢都有3.75%嘅銀河係手，上手8隻萬字清一色牌面，退可以轉雞胡，買入少少入去摸摸牌。

沽走一半 太古地產(1972)

太古地產(1972)早幾日出業績，派息居然有得加。可憐長實(1113)要減搞到最近股價落後。

今年5月尾總共買咗2注，其中一注喺 HKD17.2買入，個位超靚決定長揸。上一次高位20蚊多D，無意識要食咗先，之後跌返落17蚊附近唔敢買，呢次見返20蚊無畏dum多次春，食咗上面果注無畏囉囉巒，如果有機會跌返落去，一定再買返。

今年玩咗大半年，埋咗數計嘅，今日終於正數了，追番年頭玩匯豐輸果條大數。你老闆，追到我氣咳，仲有4個月，暫時牌面唔錯，睇今年計數可唔可以過上年。

沽清 中聯通(0762)

 今日中聯通(0762)因為業績好爆上，沽出最後一注同佢講byebye，雖然睇好佢會上返9蚊，不過今日升得太急，要D時間克服下心魔，希望下次又有機會買過。

朋友金句回顧 : 睇條撚咩，股票係買。無買升跌都唔關你事。

大跌市下 買入一注 長實(1113)

 估唔到早2日放咗長實(1113) 咁快又俾機會我買返。

其他地產股唔多跌，長實居然敢一個早上跌差唔多10%都夠膽死，唔通其他地產股業績派息會好D？雖然話減派息大戶要做低佢，但個人睇法係反應過度。

呢個世界有趣，有人賣有人買，某位股友仲犀利，劇透追咗3萬，升得返上去抵佢大心臟贏大錢。

賣出一注 長實(1113)

上個月尾跟朋友入香港大賭場，落注長實(1113)係人堆後面 “睇睇牌”，個莊呢個星期開大，決定收錢離場賺個菠蘿包食下。

匯豐(0005)經過11年，終於見返清姐眼淚位，當年話再見呢口價一定買D支持下。請原諒我膽小，之前受傷太多，好彩早前 5X 果陣決定同佢分手，唔係真係到我落淚。

增持內銀 工商銀行(1398)

策略增持第四注工商銀行(1398)，洗濕咗個頭繼續買落去，無辦法....

加注 長實(1113)

今日身邊2位權重股友都入咗少少長實(1113)，話買張飛入去睇睇牌。就憑佢地呢句，我都跟入去睇睇牌。

穿52低位 續支持 工商銀行(1398)

尋日收市買唔到，今日開市買入一注工商銀行(1398)仲低咗2格仔。

長實又返到 43蚊附近( 就係個倉平均價 >_<)，上個月仲50蚊噶嗎，睇黎又要去鞋盒底搵錢出黎買返D。今日消息賣咗大陸項目權益賺幾十億，點解李氏唔再增持嘅，有無人答我？


大神隊友語錄： "你唔追 永遠感受唔到佢幾勁 你唔買又點知係咪機會"

買入 工商銀行(1398)

昨日@$4.88、今日@$4.82，分別各買了少少工商銀行(1398)，如果聽日再跌會再買過，賭佢唔會穿之前個底。

食髓知味希望可以去返目標價 $5.2，細錢玩玩當過下手癮。

走貨 ＦＩ二南方恆(7500)

今日中午一刻，突然唔再留戀(7500)，賣在中午最低位區間，由豐盛晚飯變成茶記早餐。

身邊人士都無不談論新經濟股，特別Tesla都開始有不少新粉。這次大時代註定不屬於我，唯有收皮等下次。聽日睇下賣唔賣埋隻中聯通(0762)最後一注。

賣出 聯通(0762)

今日走咗部分中聯通(0762)賺少少微利，仲有最開頭買入果 1注平手唔想輸手續費唔走，留係到擺下。

日日2千億成交就玩果幾隻，一係啊爺玩到大家迷信換貨，唔係舊經濟股唔上，我睇大家都唔會推埋手上嘅錢落去。要割我地韭菜，唔該俾人甜下先得噶。

最怕呢段時間唔升嘅，之後新經濟股玩完，跌果陣陪跌就67。

長實(1113)，+ X哥2/7國安法之後第一個交易日，買完之後唔見有動作 (果日果注都幾大注) ，之後就日日2千億，難道表態完之後佢唔玩，費事人地話佢幫啊爺炒起個市，之後跌果陣俾人抽水就無畏？

沽清 工商(1398)

升完一棍之後，今日個市跌有點驚，沽曬工行(1398)套返少少現金。

隻(7500)本來臨收市都set 埋價出貨，可惜差一格出唔到，明日再算了。第一次買先知道呢隻嘢嘅存倉費好貴。

風花序章 買入ＦＩ二南方恆(7500)

今日恆指收市26,339 (+966 / +3.81%)，成交2,508億。早前幾個禮拜就騰訊(0700)帶飛，呢2個星期就中芯國際(0981)炒到上天，今日就幾乎雞犬皆升。

正股一早重倉可惜大上果堆升唔到我範，再買正股就無關輕重無意思，今日跟"直覺"，用埋最後一注錢，第一次買跌買入 ＦＩ二南方恆(7500)短炒下，睇怕升最勁果D點都要磨下呱，睇淡指數會跌返三幾百，然後由內銀呢類落後嘢頂下。

黎緊賭佢之前無點升嘅會追返少少，指數應該係呢個位重新開始。無論 好友 or 淡友，玩得股票嘅今日點都要出手，唔好問我點解，總之就係覺得唔出手嘅，就會錯過最精彩嘅煙花第一幕。


？？？："時間唔等人，等下等下又一年"

再增持 工商(1398)

買，策略增持工商銀行(1398)。

引用大神語錄：你要記住唔係衣加虧緊幾多，係睇之後仲有幾多賺。咁當然你all in就可以忽略我呢句話。

增持 工商銀行(1398)

見+乘哥增持長實(1113)咁開心，我都增持下工商(1398)開心下先。

其實我都好想繼續增持長實，不過呢口價已經好接近我最貴果注HKD48，計返股息，直頭仲高過添.....克服唔到心魔，都係睇下算。

身邊同事睇住騰訊(0700)上500係到eeoo話HKD450走曬走寶，咩360陣唔敢買。老老實實，股災先兆咁，不過過往係雞犬皆升，今日係得呢幾隻當炒嘢升，後市如何，得個估字。

狹路相逢勇者勝，我繼續墻邊瓦上食花生。

增持 中聯通(0762)

抽唔到京東，攞返D錢無用，撥落去買中國聯通(0762)。

有朋友推薦抽(9997)，唔熟呢D板塊唔敢玩，不過佢都抽唔到。另外還有朋友增持了網易(9999)，都係唔識，唔敢玩。

最近感覺，大.......

建倉 工商銀行(1398)

今日個市爆上，又剛好出糧無耐，無無聊聊突然碌咗下內銀。

多年前玩過隻工商(1398)，都叫係佢身上搵過少少，成個市樣樣都平，唯獨內銀好似叫無乜人留意，買返少少擺下先，過幾日就除淨，已做好心理準備"為國捐息"。

過往當炒陣係散戶最愛，身邊唔少人係佢身上賺過，亦有人輸獲勁。早年有blogger玩內銀玩到股神上身，結果潛水收場。呢段回憶百般滋味在心頭!

建倉 中國聯通(0762)

無聊買手玩下，點知即刻摸頂。

沽出 新鴻基(0016) + 抽新股

上星期本地地產股暴力爆上，食個快餐沽出新鴻基(0016)，由於膽小關係只得一手，不過都叫執少少，夠食呢個月下午茶。

資金回籠，剛好補充返抽網易(9999) + 京東，全部都係抽一手玩下。

出領展(0823) + 入長實(1113)/中石油(0857)

領展(0823)撈到個短底，呢個星期連升2次6%，賣曬佢食個雞糊壯狀膽先。朋友睇70做目標，我就袋袋平安，睇下有無機會呎D再買過。

買入長實(1113) + 中石油(0857)，前者係跟+X買少少，後面係增持少少博個tea。

建倉 領展(0823) + 增持 太地(1972) & 長實(1113) + 沽清 匯豐(0005)

啊爺港版國安法比美國佬拋，呢個禮拜跌到啊媽都唔認得。拓又唔給力，畏首畏尾咁。有本事頂死班大鱷啊嗎，什麼長遠向好。

沽清匯豐(0005)，你老闆美國佬搞大陸關你乜事，無眼睇沽清算了。本來諗住執班無息派嘅錢袋，點知俾人打劫埋。

建倉領展(0823)，照睇領展本地嘢為主，過咗呢個風頭，睇好佢返生。

增持太古地產(1972) +  長實(1113)，太地呢~撈底係我天性。就破曬上市低位，唔買過唔到自己，長實就係策略增持。

建倉 太古地產(1972) + 新鴻基(0016)

偉大嘅黨將要一錘定音“香港國安法”，威力當然不及當年鄧當家話收返香港咁震撼，不過都夠你跌到仆街。

政治博弈最大利益一定係企啱邊，咩叫前車可鑒？你睇香港樓就知咩事，有錢嘅，無得走嘅都企曬邊，至於有幾多邊企，就睇本事了~

唔理你藍C 黃C，香港呢次玩出火，網上有人講，藍C 攬炒最多輸D錢，黃C 攬炒睇黎要輸一世。

你老闆，被攬炒，本投機偽價投個倉都就變 "僵 C" ，半生不死。為咗支持一向嘅投機理念，決定買入太古地產(1972) + 新鴻基(0016)。唔好問點解，自己去睇圖，咁跌法都唔買，覺得對唔住自己自稱為一個股票投機者。

大海對面。今日唔少一國兩制下嘅澳門觀眾，應該有入場掃貨。點解？....太長了唔想打字鳥。

增持 長實(1113)

呢幾日見長實最高上返50蚊+，跌咗幾日殘殘地，尋日決定增持少許長實(1113)。

理得佢係咪世界最【襟捱】嘅企業，呢個市跟本唔睇呢D嘢，唔鬼理，等下星期二除淨又要送手續費俾銀行，贏又唔志在，輸就唔爭在。

乜7都貴陣難落手，E+乜7都平又係一樣難出手。

~ 煙已柯，重倉等運到，唔使成日諗咁多。

繼續增持 匯豐(0005)

匯豐(0005)近期因唔派息事件，搞到股價仆街跌多獲跌到落谷底，搏底已見跟返大市上返去追落後，增持匯豐一注壓壓倉，目標 46蚊搵個下午茶。

個市唔知跌完未，但對比年頭風險已經明顯降低唔少，有"剩"當贏嘅時機稍縱即逝，眨眼一個星期已錯失不少機會，唔把握機遇入場最後都係一場空，今日出手後手頭大部分資金已經重新投入接飛刀。

長實(1113)最近跑贏地產板塊，最高位果注差幾豪紙就返家鄉，好感動亦都好懊悔，之前 3x蚊雖然敢買但唔敢大注，又上一課。

增持 匯豐(0005)

近日坊間報道槓桿投資匯豐(0005)嘅慘慘豬血淚史，睇黎燶咗班人已經走得7788。

近幾年同呢隻股票有一腿嘅，都已經被玩到體無完膚，風險降低就係執煙頭時間，星期四收市前 41蚊高追追入一注，曾經令我傷心嘅股票，落難時候我仍然黎支持，原來我對匯豐還有愛~

賭股同日爆上，睇黎我對賭股嘅幻想，要修正了。

買入 匯豐(0005) + 長實(1113)

昨日收市前睇咗下小股東聲討大會，決定買入匯豐(0005) @ 39蚊支持下。幾年前買入果注最平 45蚊，估唔到幾年後口價更低，勁過當年脫歐百億成交果種恐慌。

長實(1113)越升越有，買返少少搏條火棒未燒完。之前買入果3注，平均價已經返家鄉略有小利，最貴果注 48蚊希望都可以快點攞到 R. H. C.。

+ x 系呢次揀長實重注，希望唔好令我失望喇。長和(0001)太傷我心，恕我呢次唔同佢玩。

沽出 中聯通(0762)

昨日聯通(0762)爆上，沽出賺個下午茶調劑下股災嘅心情。

F三星原油期(3175)最近坊間好爆，考慮入去玩火棒ing。

建倉 中國聯通(0762)

呢隻股票都好多年無掂過lu~ 之前14~15年玩過下，當年9蚊~12蚊上上落落，索過少少，後黎轉玩中移動(0941)得個吉，入一注擺下試下水溫先。

長實(1113)個底卜中咗一注，現價HKD43平均價叫賺少少。考慮過建倉匯賢(87001)同泓富(0808)，但計過就算上返去平均位，升幅其實同長實期望位差唔多。心大心細想趁長實個價同平均差唔多，趁+X家族增持加大個倉搭轉順豐車，不過最近真係升得太急，都係算。

周街都係平嘢，最後都係決定入中聯通，分散下板塊風險。

匯豐(0005)今日話除淨咗都唔派息，好彩年頭走曬執返身彩。

增持 長實(1113) + 中石油(0857)

尋日忍唔住手，策略增持咗中石油(0857)，呢隻仆街嘢無嘢好講，鬥長命，下次增持目標價1.5~有種就黎見我。

同日睇緊股票app時，My友人·綽號"股壇屎拉霸"，聞說係廁所玩手機陣，唔覺意肥手指篤咗DD長實(1113)，十分謙虛地po了張圖作為紀念。一看之後我都立刻跟少少壓壓驚，估唔到今日即刻有驚喜。
( 此圖乃屬友人 · "股壇屎拉霸" 之肥手指紀念圖，不得轉載 )

 今日最勁升到HKD39.65，下圖留個紀念，我都跟友人車尾賬面賺D。至於業績如何，坊間大把blogger講我就費是鳩up喇。

股災之下，打住支嗎啡鎮下痛先，賬面仍舊輸到仆街，股市從來先講生存再講賺錢。

增持 長實(1113)

全世界股災唔使講......尋日午後個市突然爆上，見勢忍唔住增持長實(1113)，上次買入係10日前，估唔到短短10日，應曬果句：今日低位明日高位。

另外中石油(0857)真係你老闆，咁撚大間國企你咁樣玩鳩D小股民，啊爺你係咪推緊我企係對面......#$%%@#!#，呢幾年歷史遺留嘅嘢，我睇可以準備留俾下一代。

股仔 · 60%
茄薯 · 27%
定期 · 13%

睇返轉頭，當日 壯士斷臂 HKD57清倉匯豐(0005)，HKD71清曬長和(0001)，HKD2.0清埋莎莎(0178).....依加舒服曬。好撚啊Q.....

曾經令我大賺嘅中海油(0883)跌穿我當年嘅入貨價，但當年唔同今日，最近計劃石油股重新部署，下次分曉。

買入 長實(1113) + 中石油(0857)

 長實(1113) + 中石油(0857) 買少少擺下

賣出 長實(1113)

短炒幾日獲利少許，沽清長實(1113)。銀行真好賺，我食2份佢咬1份。

買入 長實(1113)

最近清咗匯豐(0005)手頭揸多咗現金，見長實(1113)呢幾日一反常態，成交量俾其他本地地產股多，但口價又唔多上有D怪，昨日買入少少壓壓驚，費事太淡俾啊爺夾爆春袋，玩正股嗷路無貨無仇報。

咁喬買完之後個倉位，一半現金一半貨，難道呢D叫進可攻退可守？

沽清 匯豐(0005)

壯士斷臂，今日清倉第一大持股，持貨4年嘅匯豐(0005)。再見大象！

5年間總共儲咗18注，另加中途換過1,200股股代息儲到E+，除咗16年3月果注特大注嘅定海神針注之外，其餘17注全部虧損離場，扣埋股代息部分，呢次走貨賬面都要輸成6萬幾，痛到不要不要。

痛係因為 投入本多時間多，可惜利錢少。匯豐呢個投資，計返呢幾年無股代息，已經落咗袋果 D仲叫賺少少，算係可以打下飛機自 J，我呸~ 呢D飛機 J 黎有7用，當我無講。

呢次清倉匯豐主要喺怕人禍，範圍太廣唔可以唔小心為上，點解話係人禍？一圖說之~

其次，啊爺要撐HK其實好多方法，不過調轉俾機會啊爺逗住HK個春袋，名為"抗疫停自由行"，呢尾藥我怕唔係人人受得到。再者，沙士有啊爺飯都未食飽關照食魚翅嘅焗撐，呢次係啊爺都唔多掂。所以趁唔係輸得好多，換返茄薯防身，或者擺下定期定定驚，以圖他日東山再起。


最後自己提自己一句：知命者，催吉避兇，保存實力，待時而起，順求利，逆求存~