2018年12月17日星期一

年結 2018

話咁快又一年,睇返上年記錄嘅股市足跡( 2017總結 )感觸良多,往年大市順豐順水,今年被動挨打,慶幸根基打得穩今年力保不失,不過明年就難有咁幸運嚕。

今年股票埋數"落袋計",連埋股息同比增加 54.1%,其中股息占總收入 35.9%,而股息對比上年增加 13.2%,買賣VS收息大概都喺維持6:4左右,雖然今年市道唔太好,但今年成績表反而喺歷年表現中最好嘅一年,多得中海油(0883)今年嘅神勇表現。現手上仍然持有匯豐(0005)、中石油(0857)、長實(1113)、長和(0001)、滬深300(3188)呢5隻悶股,希望能夠挨過中美貿易戰呢場大龍鳳。

股票呢樣嘢,無信念真喺好難贏,升揸唔穩,跌揸唔住。經歷2017同2018大上大落之後,我發覺寫諗法好重要,但偏偏份人好懶,希望下年可改之。

澳門樓市方面,仍然維持2017觀點,睇2019有無機會執平嘢,部分首期已經擺落銀行定期候命,今年銀行存款開始有可觀嘅利息,同前幾年比簡直可以話係差天共地,本地2間大嘢都出Plan半年2.88%~2.89%,對比買樓收租呢樣嘢,如果樓唔升就已經無意思了,或者我覺得打理太麻煩唔值罷了。而且對比三個月前,已經明顯向下調整10%,但只喺返年頭水平附近,睇黎我又可以繼續喺班Tea友到繼續"牙插插"。


知命者,催吉避兇,保存實力,待時而起,順求利、逆求存。

11 則留言:

  1. 師兄, 我都打算2019 可以執下平貨, 不過我期望不大, 首置8成真係好強的一個強心針, 除非雷曼again

    回覆刪除
    回覆
    1. 愚見覺得8成呢招喺把雙刃劍,當年97年香港可以碌咔俾首期一樣,背後其實都喺個"借"字,無事就8仙過海,有事就泥菩薩過江。

      刪除
    2. 的確是...提早消耗購買力, 澳門始終唔似香港有每日150個新力軍..只靠外勞支持租賃

      師兄下年的買股目標會放在什麼地方? 也是以收息為主嗎? 我見師兄年收息已過六位數, 好強!

      刪除
    3. 老王兄:
      根據統計局公佈數據,澳門人口凈流入都好勁一年都幾萬移民,好快澳門就70萬人噶喇。但呢班人唔少都喺過來攞張證攞福利果種,你參考每日出入境人數條數大概可略知一二。租賃方面自從15年24Hrs通關之後本地已經轉為本地用家主導。

      至於股票跟據此blog記錄,"blog主"應該喺收息為輔,炒賣獲利為主,只不過因為揸得比一般人耐所以收埋息咁解。賭股或者喺下年一個唔錯選擇,正所謂生意淡薄不如賭博。

      牛肉乾 字~

      刪除
    4. 牛肉哥你好,
      我都試過研究澳門會唔會複製到香港的地小人多局面, 跟據統計局, 而家有18萬外勞, 每年有4000個BB 出世, 加3000-4000 個大陸移民, 而且2021年沒有任何新經屋落成, 我估樓價到2021年前都只會10%左的調整

      你都係馬交仔嗎? 哈哈, 見Blog 主係同鄉忍唔住講多兩句, 有親切感

      刪除
    5. 老王兄~
      唔知係咪我記錯,我記得我睇統計局數據,澳門新增人口2017已經差不多多咗4萬人,呢個得閒要再考證下,我記唔清了。

      另外,澳門喺無可能複製香港,地產方面亦都跟唔到香港,原因係土地政策同商業環境。你睇澳門一線豪宅,同樣價錢回報連香港東涌不如。當然澳門有佢獨特之處,地方細而且大陸有水喉射住。但就我觀察澳門個經濟循環,北水-賭場/政府-商家-市民-回流商家-離開澳門,簡單講養唔住水。

      至於調整幾多,其實好難估,不過有幾點要參考。

      第一人工增長,賭場新入職由12年之後增長率其實唔高,到依加都係萬幾未過二,已經無咗7、8年前果種爆發力,雖然失業率低,但同時睇到就業市場開始飽和,公務員加得多但人數有限,當然香港樓市強力支持者喺香港本地公務員都要承認。

      第二政策,8成按揭呢尾藥,眼見周圍後生個個買樓眼都唔望多2下就去馬,食個下午茶就跟跟計較,而且就算8成,好多連果少少嘅首期、裝修同稅項雜費都要透支上一代,或者過幾年睇下離婚率喺好有趣嘅事。

      第三股市,就睇賭股板塊同港股,我呢D股海小薯就不獻醜喇。

      第四利率,香港唔跟美國加息主要係游資拓住,萬一資金離開要追果陣,加息速度好大機會喺好快,所以香港有嚴格嘅壓測,但澳門喺等於無,呢個就正正係本地風險。

      刪除
    6. 謝師兄回覆, 澳門租金回報真係差到無朋友, 而且澳門同香港的供地政策的確係好大分別, 澳門我都無聽過近年有發展商話有新地, 連澳門的批地政策我都搞不清....

      講供需同水池真係無得同香港比...可能我太理想地以為可以同香港樓有掛勾....

      謝謝回覆!!

      刪除
    7. 澳門 最近2年我有印象,就政府批咗塊,占氹仔可建樓面唔知咩總面積5%嘅地,俾間大陸唔G乜HK上市公司,代價30億,起完之後照現在市價 肯定過百億無走盞,唔知係咪氹仔油站旁邊塊。亦都咁講, 所以話澳門發展商防守力強,無大事發生澳門呢塘水慢慢滾,投資角度第二間考慮HK係好選擇。

      刪除
    8. 雲兄,

      //所以香港有嚴格嘅壓測,但澳門喺等於無//
      小弟不才, 後面這句應該如何去理解?

      sk

      刪除
    9. Re://小弟不才, 後面這句應該如何去理解?//
      香港有加3厘,澳門加嘅喺"0"。

      而且澳門只要有"爸爸"肯攞層樓出來擔保,就算"爸爸"65歲退休,啊仔只要30歲樓下,一樣可以借到去啊仔60歲即30年,連首期裝修都可以借埋。

      刪除
    10. 謝匿名兄指教
      我一直以為澳門既銀行壓測係要+3%
      sk

      刪除