2023年6月10日星期六

平凡人的投資道路,必須早買樓?

最近有Blogger講細果陣老師講人有好多機會,機會到陣最緊要有鏟,然後要分係唔係陷阱。突然諗起有句說話講:"貧窮可以世襲"。人大咗,覺得呢句說話真係一般人命運嘅緊箍咒。

早前有個"少年得志"嘅公務員年青人同我閒談,講咗一輪自己點努力,年紀輕輕就買咗間小蝸居,平日有時間就揸車同條女兜風(順便xx),捨意人生。不過講講下就抱怨好辛苦,歎氣點解"辛苦咗咁耐",好似乜都無改變,仍然生活這麼難,問如何可以更富有?

一般人,如果無家庭支援,係呢個資本社會裡面,想改變命運,首先就係要節儉。只有節儉,你先有機會儲到自己第一桶金,亦即資本。然後你需要幾個機會,係投資市場上面翻滾下,將桶金好似雪球咁滾大佢,然後就可以“開始”改變命運。(讀多D書當然都好大機會都得,不過唔係呢到探討)

但呢個過程絕非一帆風順,首先有幾個年輕人必然遇到嘅"時代陷阱",隨時出現係所有一般人面前,我列舉幾點:

第一,打卡文化(包括:換電話,去旅行,同條女慶祝,買呢樣果樣潮玩......),其實就係追求錦衣玉食。

第二,買車、買保險。(一般人買新車,已經成年幾、兩年人工,就算二手,養車同保養條數亦細水長流)

第三,結婚搞大龍鳳(不解釋)

第四,買樓。

由踏入社會工作開始,一般人頭10年,就第一、二點,大概有50萬-80萬左右嘅水位。第三點可以有10萬-30萬左右嘅水位。

最難係第四點,何解?首先,如果決定買樓,照現代社會嘅遊戲規則,基本上10年以內,你人工嘅一半已經放咗落間樓到。唔好同我講買平D咪得囉,現代後生仔基本只會帶比自己個頭更大嘅頭盔。(手續費約4.5%左右,未計裝修家電之類,計埋個首期,一球走唔甩)

如果踏入業主階級,亦即代表呢一半嘅收入不受支配,被動跟所謂嘅樓嘅價值投資,係我睇等於乾塘,除非你人工三級跳,但咁樣就唔係一般人,亦等於你來緊10年基本上仲困難過買樓之前。更何況買完樓,一闊三大,各種開支接踵而來。

何來資本累積,更談何投資增值。到你供得10年8年後,細嘅要讀書學興趣班,你仲點投資?過中理由、說法、解釋千百種,我就不廢話。

不如我簡單講,如果你今日30-35歲(未到就自己想象,過咗嘅就諗返下以前),你寧願每個月跌2萬比銀行揸住間樓打飛機,買個股票Min Pay手續費都左計右計,定係選擇做個每個月比租8k,手入面每個月仲有"萬2蚊"閒錢彈藥,加上球幾甚至2球嘢係手嘅人。

樓其實無需早買,如果閣下能力唔足以擁有間樓,勉強而為只會自己辛苦,甚至輸一世。但如果你有能力,其實到你有能力踏入呢個領域果刻開始,後面只係你入唔入去同想幾時入去嘅問題,而唔會機會一失不再來。

如果你怕投資最後一頭空,有間樓揸係手始終有保障,咁你就唔好要求咁多喇,好好做你嘅樓奴。如果閣下輸死都唔怕,咁恭喜你,最低限度你60歲可以快速申請間公屋,得天下。何解? 三公得天下自己Google下。

在我睇,樓有幾個不容忽視嘅風險,槓桿、息率、工作、社會環境,但呢幾個都唔係最主要,最難搞係"思維僵化",一般人最難係跳出舒適圈,試想下、回憶下,有樓之後,你仲有無閒情、心機、動力、銀力去搞投資先,樓絕對係一般人嘅罩門。疫情過去,就結果論,睇邊D人最容易起返身,有力去投資。

唔係叫你唔買,試下大膽假設,到50歲先買樓得唔得?(唔好同我講做唔到按揭,或者得返10年供,如果咁樣,你都係準備去申請公屋喇,到呢個年紀你仲要將呢D point 掛嘴邊先,證明你好打極有限)如果唔想做一般人,一你就讀多D書用收入衝破一般人嘅台階。二你就放棄一般人想嘅嘢,闊出去唔好行一般人行嘅路,鍛煉自己成為一條割人韭菜嘅韭菜。(有個網絡飛機文話陳奕迅請教投資,老實講,佢專心去開演唱會好過搞呢搞路喇)

樓遠睇都係跟通脹,長時間唔會偏離通脹好遠。數十年後如果你投資跑唔贏樓,咁證明你只係比一般人差D。但如果你一般人條路,咁你結局最多都係比一般人好D。順便提一句,如果你樓都未供完,千奇咪諗話留返間屋比個仔第日娶老婆,或者你諗下第日你個仔個老婆,萬一同你個仔離婚分鳩你間屋嘅問題先。

買樓同投資,一般人永遠係魚與熊掌。




1 則留言: