澳門 - 海上居 參觀有感

近日同fd去睇咗5座42樓示範單位全層。全部開放式or一房，戶數由A去到M，4部Lift。

區分環境問題不作討論，以下個人觀點，唔構成任何要約之類：

優點，向大陸方向無敵遠景，高過30樓有種君臨天下之勢。私密度都算幾好唔怕樓望樓。部Lift底高有冷氣，部電視放Lift門上方便低頭族做下上昂運動。

缺點，其實咁嘅面積單位基本無乜好講，由3樓去到44樓，全部一房or開放式共超過500伙，單身狗天堂，返工時間女士搭Lift齋think都覺得爽。唔少單位中間有橫樑，要改動相當困難，用料還可以可惜手工質素差D，如果俾有線詹生驗樓估計60分多D，就我睇到有2間示範單位D玻璃睇落去係哈哈鏡咁，有興趣自己可以實地觀測。成萬蚊一建尺買溢價太高，6球嘢澳門街大把選擇。

真係有興趣係澳門置業朋友，去隔黎海天居睇一三座D一房，間2房or正2房單位，自己再比較，價錢差唔多但可塑性高好多。

同樣保利達出品，去到呢口價，個人認為加少少買海富花園比較好，雖然舊，但性價比差太遠，想象下600尺VS1400尺就會有結論。

海上居感覺似2014年中海外(0688)係澳門推嘅【雙鑽】。唔明？自己行去隔黎【君薈】參考下。仲唔明？四個字：中伏居多。