止賺一注 中海油(0883)

股市最近跌到啪啪聲，散戶一殼眼淚。本應係買貨時機，但今晚美國好大機會會公佈對華貿易制裁2000億落實細節，所以都係忍一忍，明日再算。

今日將本年度買入的中海油(0883)全數放售@HKD13.44，埋數小賺(未計今日除凈)。呢次注碼控制得唔係太好，上面買得太多，下面唔係幾敢買，要檢討下。
- "5月至7月均有買入，最高買入HKD13.90，最低HKD12.30，平均HKD13.10"



長和(0001)長實(1113)最近2日開始回購，而且今日長建(1038)出現19.17億超大成交(收市價HKD58.75)。大公子玩財技，有本有場有前景，相信錢途較其他綜合企業樂觀。
- "上面三隻全部持有，長和最多，長實最少，稍後會主力增持長實，費事好似當年買三桶油，就係鬥氣唔買中石化(0386)，結果賴曬嘢。"

匯豐(0005)已經跌入策略增持線，一直無出手係因為中美貿易戰，大市要跌大象無運行，而且大象係我第一持倉，睇多一排再考慮。

組合計，我個偽價投Pool暫時尚算跑贏大市。大跌市撈底好股，長線而言一定有利可圖，所以真正的價值投資者，不應怕股災， 只應怕股災發生時沒有足夠資金去撈底。因此資金管理好重要，撈底要有策略，宜分段進行， 不然在不理性拋售後， 出現更不理性拋售時，你已經無能為力， 只能做旁觀者。